Bıyl baıqaýǵa 21 avtor qatyssa, qazaq tilinde – 9, orys tilinde – 12 qoljazba usynylyp, halyqtyq onlaın daýys berý nátıjesinde jas qalamger Álıhan Jaqsylyqtyń «Týrgenev kóshesindegi úı jumysqa qabyldaıdy» atty romany úzdik dep tanyldy.
Jeńimpazǵa «Freedom Holding Corp.» kompanııasynyń enshiles uıymy – «Freedom Finance Life» ómirdi saqtandyrý kompanııasynan ómir boıy aı saıyn 500 AQSh dollary mólsherinde tólenetin erikti annýıtettik saqtandyrý polısi tabystaldy.
Marapattaý rásiminde Mádenıet jáne aqparat mınıstrligi Arhıv, qujattama jáne kitap isi komıtetiniń tóraǵasy Rýstam Álıuly quttyqtaý sóz sóılep, ádebıetti qoldaý sharalary týraly aıtty.
«Ádebıet – ulttyń rýhanı tiregi, ol sana men sezimdi tárbıelep, ótken men búgindi sabaqtastyryp, bolashaqqa baǵdar beredi. Mádenıet jáne aqparat mınıstrligi qalamgerlerge qoldaý kórsetý maqsatynda «Aıboz» ádebı syılyǵy, Prezıdenttik arnaýly ádebı syılyq, «Daryn» jastar syılyǵy syndy mańyzdy bastamalardy júzege asyryp keledi. Sonymen qatar ótken jyly Qazaqstan Jazýshylar odaǵymen strategııalyq áriptestik aıasynda 3 jańa joba iske asyryldy.
Memleket basshysynyń 2025 jyldy «Jumysshy mamandyqtary jyly» dep jarııalaýyna baılanysty, jas qalamgerlerge arnalǵan «Erlik pen eńbek dastany» atty jańa baıqaý jarııalandy. Munyń barlyǵy – ulttyq ádebıetti damytýǵa jáne shyǵarmashylyq qaýymdastyqty qoldaýǵa baǵyttalǵan keshendi jumystardyń naqty kórinisi. Búgingi baıqaýdyń ereksheligi – onyń memlekettik bıýdjetten táýelsizdigi. Biz mundaı azamattyq bastamalardy joǵary baǵalaımyz», dedi Rýstam Álıuly.
«Mecenat.kz» jobasynyń negizin qalaýshy Erlan Asqarbekov maýsym saıynǵy qatysýshylar deńgeıiniń artyp kele jatqanyn atap ótip, jeńimpaz týyndylardyń barlyǵy shet tilderine aýdarylyp, baspadan shyǵyp jatqanyn jetkizdi.
Al joba mesenaty, «Freedom Holding Corp.» kompanııasynyń bas atqarýshy dırektory Tımýr Týrlov baıqaýdy qoldaý – kompanııanyń adam áleýetin damytýǵa baǵyttalǵan uzaqmerzimdi strategııasynyń bir bóligi ekenin aıtty.
Atalǵan júldeni 2022 jyly «Kúlpet» romanymen jazýshy Sharhan Qazyǵul jeńip alsa, 2023 jyly «О́lgender qaıtyp keledi» romanynyń avtory Turysbek Sáýketaev, 2024 jyly «О́mir báıteregi» romanymen Qazaqstannyń eńbek sińirgen qaıratkeri, halyqaralyq «Alash» ádebı syılyǵynyń laýreaty Sáýle Dosjan ıelengen.
