Alıment tóleý tártibi ózgerdi

Jıynǵa Joǵarǵy Sot alqalarynyń tóraǵalary men sýdıalary, ǵylymı-konsýltatıvtik keńes músheleri, quqyq qorǵaý jáne ózge de memlekettik organdar - Bas prokýratýra, Ishki ister mınıstrligi, Qarjy monıtorıngi agenttigi, sondaı-aq notarıat ókilderi qatysty. Kún tártibinde birneshe mańyzdy normatıvtik qaýly jobalary talqylandy.

JS sýdıasy Ǵazıza Musabekova otyrys barysynda 2025 jyldyń 1 shildesinen bastap kúshine enetin normatıvtik qaýlylar jobasyn tanystyrdy. Onda kassasııalyq satyǵa joǵary talaptar belgilengen. Bul ózgerister sot tóreligin sapaly júzege asyrý, quqyq qoldaný birizdiligin saqtaý, sondaı-aq quqyqtyq túsiniksizdikter men yqtımal qatelikterdi azaıtý maqsatynda jasalyp otyr.

Normatıvtik qaýlylar jobasynda qarastyrylǵan negizgi erejeler:

• Qylmystyq ister boıynsha sot aktilerin kassasııalyq tártipte qaıta qaraý negizderi naqtylandy;

• Shaǵym jáne narazylyq berýge quqyǵy bar tulǵalardyń tizimi kórsetildi;

• Shaǵymnyń mazmunyna qoıylatyn talaptar men ony qaraý tártibi bekitildi;

• Tómengi satydaǵy sottardyń sheshimderin qaıta qaraý kezinde kassasııalyq sottyń áreket etý tártibi aıqyndaldy.

JS sýdıasy Elena Maksıýta sot bıligine qatysty ózgeristerge toqtalyp, tómendegi mańyzdy aspektilerdi atap ótti:

• Kassasııalyq sot tóraǵasynyń azamattardy jeke qabyldaýy retteledi;

• Buqaralyq aqparat quraldarynyń sot otyrystaryna qatysýyna negizsiz shekteý qoıýǵa tyıym salynady;

• Sotqa BAQ tarapynan yqpal etý áreketteri úshin jaýapkershilik kózdeledi (bul «Mass-medıa týraly» Zańnyń 67-babynyń 2-tarmaǵynda kórinis tapqan);

• Sýdıany tártiptik jaýaptylyqqa tartý úshin naqty negizder men talaptar naqtylandy, sonyń ishinde zańdy óreskel buzǵan jaǵdaıda qoldanylatyn sharalar.

JS sýdıasy Rázııa Qýanyshbaeva normatıvtik qaýlydaǵy azamattyq isterge qatysty ózgertýlerdi usyndy. Atap aıtqanda, erli-zaıyptylardyń ortaq múlkin bólý týraly talap qoıý merzimin durys esepteý erejeleri naqtylandy jáne de alıment óndirýge qatysty keıbir erejeler alynyp tastalǵan.

Qabyldanǵan normatıvtik qaýlylar týraly tolyq aqparatpen Joǵarǵy Sottyń resmı saıtyndaǵy «Zańnama» bóliminen tanysýǵa bolady. Sonymen qatar, qujattar QR normatıvtik quqyqtyq aktileriniń etalondyq baqylaý bankinde resmı túrde jarııalanady.

Alına QAIRATQYZY,

EUÝ 2-kýrs stýdenti