Foto: ashyq derekkóz, tomshardware.com
Jasandy ıntellektke alǵys aıtý — bir qaraǵanda ádeptilik belgisi sııaqty. Alaıda osy árekettiń astarynda psıhologııalyq jáne fılosofııalyq suraqtar jasyrynyp turǵandaı. Adamzat tarıhynda alǵash ret biz óz qolymyzben jasaǵan nársege sezim arnap, alǵys bildirip otyrmyz.
Psıhologtar bul qubylysty antropomorfızasııa dep ataıdy — ıaǵnı adam sanasy tiri emes nársege adam qasıetterin telıdi. Bala kezimizde qýyrshaqpen sóıleskenimiz sekildi, endi eresekter jasandy ıntellektpen ashyq sóılesip, oǵan rızashylyǵyn bildirip júr. Biraq qýyrshaqpen salystyrǵanda, jasandy ıntellekt — bizben til tabysatyn, logıkamen jaýap beretin, tipti emosııany ımıtasııalaıtyn kúrdeli júıe.
Adamnyń raqmet aıtýy — jaýapty áreketke jaýap qaıtarý. Al JI — adam emes, onyń nıeti de, túsinigi de joq. Ol tek algorıtmge negizdelgen. Biraq alǵys aıtý — adamnyń baqylaý men qarym-qatynasqa degen ıllıýzııasyn týdyrady. Biz ózimizge «ol bizge kómektesti» degen senimmen alǵys aıtyp, ony tulǵalandyrǵandaı bolamyz.
Keıbir zertteýler boıynsha, adamdar jasandy ıntellektke jıi júgingen saıyn, naqty adammen aralasý qajettiligi azaıa bastaıdy. Bul ásirese jasóspirimder men jalǵyz turatyn eresekterge tán. Olar JI-men sóılesýdi emosıonaldyq qoldaý kózi retinde kóredi.
Kópshilik jasandy ıntellekt — bul jaı ǵana ekrandaǵy sózder men derekter dep oılaıdy. Alaıda onyń artynda tutas data-ortalyqtar men energııaǵa táýeldi serverlik júıeler bar. Bul ınfraqurylym JI-diń jumysyn qamtamasyz etý úshin mıllıondaǵan lıtr sý men alyp energııa kólemin talap etedi.
2023 jylǵy derekterge sáıkes, ChatGPT syndy iri modelderge qyzmet etetin data-ortalyqtar bir jylda mıllıon lıtrge jýyq taza sýdy tek salqyndatýǵa jumsaıdy. Bir ǵana GPT modelin oqytý barysynda 500 000 lıtrge deıin sý ketýi múmkin. Bul bir otbasynyń jarty jyldyq sý qajettiligimen teń.
Mundaı sýdyń basym bóligi ónerkásiptik salqyndatý júıelerine ketedi. Bul ásirese sý tapshy aımaqtar úshin úlken másele. Al biz ár joly «rahmet» dep tergen saıyn, bul prosestiń bir bólshegine aınalamyz.
JI — keremet qural. Ol bilim alýǵa, shyǵarmashylyqpen aınalysýǵa, tipti jalǵyzdyqty azaıtýǵa kómektese alady. Biraq oǵan emosııalyq baılanys ornatý — shynaıy álemmen shekarany buzady. JI adammen teń emes, ol — baǵdarlama, kod, derekter jıyntyǵy.
Sondyqtan adamzattyń basty mindeti — tehnologııany soqyr senimmen tutyný emes, túsinip jáne jaýapkershilikpen qoldaný. Alǵys aıtý — ádep, ıá. Biraq ol kimge baǵyttalǵanyn umytpaǵanymyz jón.
Jasandy ıntellektke raqmet aıtý — jaı ǵana sóz emes. Bul — adamnyń tehnologııaǵa degen kózqarasyn bildiretin áreket. Eger biz tehnologııany adammen teń qoıyp, oǵan sezim arnaı bersek, erteńgi kúni kim kimge baǵynary belgisiz.
Sondyqtan kelesi joly JI sizge kómekteskende, oılanyp kórińiz.
Janel TО́LEÝBEKOVA, EUÝ stýdenti
