Foto: akorda.kz
Svetlana Jaqypova bıylǵy 1 mamyrǵa deıin 157,8 myń adamdy eńbekpen qamtý sharalary júrgizilgenin jetkizdi. Olardyń ishinde 143,2 myń azamat jumysqa ornalastyrylǵan. Jyl basynan beri 232 myńnan astam adamǵa ataýly áleýmettik kómek kórsetilgen.
Prezıdentke eńbek qaýipsizdigin qamtamasyz etý jáne eńbek quqyǵyn qorǵaý boıynsha qabyldanǵan sharalar týraly aqparat berildi. Júıeli jumystyń nátıjesinde óndiristik jaraqat alý kórsetkishi bıylǵy I toqsanda 17 paıyzǵa tómendedi, al ólimge ákep soǵatyn qaıǵyly oqıǵalar ótken jyldyń osy kezeńimen salystyrǵanda 5 paıyzǵa azaıdy. Budan bólek, kásiptik táýekelderdi anyqtaý, baǵalaý jáne aldyn alý, sondaı-aq eńbek qatynastaryn deklarasııalaý tetikteriniń avtomattandyrylǵan júıesi engizilip jatyr.
Svetlana Jaqypova Jobalardyń ınnovasııalyq navıgatoryn engizý jóninde aıtty. Bul memlekettik ınvestısııanyń tıimdiligin arttyrý jáne jumys oryndaryn sapaly túrde josparlaý úshin ázirlendi.
Qasym-Jomart Toqaevqa áleýmettik qoldaý kórsetý úderisin sıfrlandyrý jumystary tanystyryldy. Atap aıtqanda, mınıstr áleýmettik-ekonomıkalyq ornyqtylyq pen osal otbasyny baǵalaýǵa arnalǵan skorıngti modeldi qoldaný tujyrymdamasyn usyndy. Bul jobany engizý qarajatty shyn muqtaj jandardyń paıdasyna qaıta bólýge jáne qoldaý sharalarynyń naqty ıesine jetýine múmkindik beredi.
Kezdesý sońynda Memleket basshysy áleýmettik saıasatty odan ári jetildirýge, ataýly kómektiń tıimdiligin arttyrýǵa, jumyspen qamtý sharalaryn keńeıtýge, eńbek jáne áleýmettik salalardy sıfrlandyrýǵa baǵyttalǵan birqatar tapsyrma berdi.
