ORAL. 6 mamyr. Batys Qazaqstan oblysynyń ortalyǵy - Oral qalasyndaǵy «Zenıt» zaýyty óziniń kezekti sý jańa kemesiniń tusaýyn kesti. Kemeni sýǵa túsirý sharasyna elimizdiń áskerı teńiz kúshteri salasynyń qyzmetkerleri men zaýyt jumysshylary jáne qala turǵyndary jınaldy. Bul týraly egemen.kz habarlady.
Táýelsizdikke qol jetkizgen jyldardan bastap «Zenıt» zaýyty elimizdegi keme óndirisi salasynyń kóshbasshysy atandy. Bul – Kaspıı teńizindegi shekara tynyshtyǵyn kúzetýge attanatyn zenıttikter shyǵarǵan 23-shi keme. Basty ereksheligi – sý betinde úzdiksiz 3-5 táýlikke deıin saǵatyna 100 shaqyrym jyldamdyqpen júze alady. Sonymen qatar, álemdik keme jasaýdaǵy barlyq tehnologııalar eskerilgen. Zenıt ónimi qarýly da qýatty. Sala mamandary tez qozǵalyp, kúrt buryla alatyn «FC-19» kemesiniń kúshimen teńiz shekarasyn buzýshylar men zańsyz balyq aýlaýshylardy ońaı qolǵa túsiretinderin aıtady.
«Teńiz tynyshtyǵy, ondaǵy tártipti qadaǵalaý Qazaqstan qarýly kúshteri úshin úlken syn. Búgin memleketimizdiń aıbyny men qýatyn odan ári arttyra alatyn tarıhı oqıǵaǵa kýá bolyp otyrmyz. Táýelsiz elimizdiń tynyshtyǵyn kúzetýge zor úles qosyp júrgen «Zenıt» zaýyty ujymynyń eńbegi ereń. Búgingi sýǵa túsirilgen kememen júretin elimizdiń shekara qyzmeti saqshylaryna aq jol tileımiz», – dedi saltanatty rásimde Batys Qazaqstan oblysy ákiminiń birinshi orynbasary Arman О́teǵulov.
Temir Qusaıyn.
Derek: egemen.kz.
Sýret: «Moı Gorod».
