О́ńirlerdiń órkenin tek óndirispen baılanystyrý qazirgi kezde qısynsyzdaý. Sebebi qazir týrızmen bir óńirdi ǵana emes, bútin bir eldi qamtamasyz etýge bolatynyn álemdik tájirıbe kórsetip otyr. Muny Prezıdent Qasym-Jomart Toqaev Ulttyq quryltaıdyń bıylǵy otyrysynda da aıtyp, týrızm aımaqtyq damýǵa serpin beretin sala ekenin aıtty.
Mysaly, Abaı oblysy dese eń aldymen eske túsetin tarıhı nysandar mol. Bul óńir – Abaı Qunanbaıuly, Shákárim Qudaıberdiuly, Muhtar Áýezov syndy uly tulǵalardyń izi qalǵan, Alash tý tikken tarıhı meken. Semeı polıgony – ıadrolyq synaqtar ótken qasiretti aımaq, Qońyr áýlıe úńgiri – emdik qasıeti bar oryn, Ertis ózeni – óńirdiń negizgi sý arterııasy, ásem Tarbaǵataı taýlary – tabıǵatyń naǵyz tal besigi. Buǵan qosa Semeı qalasyndaǵy tarıhı ǵımarattar men memorıal-mýzeılerdiń orny múlde bólek. Bul rette Semeı qalasynyń ózi úlken bir týrıstik jobaǵa suranyp-aq tur. Elimizde mundaı tarıh pen tabıǵattyń úılesimi Oral men Semeıde ǵana bar deýge bolady.
О́ńirdiń osyndaı artyqshylyǵyn keńinen zerttegen jergilikti bılik jýyrda Abaı oblysynda taǵy bir jaǵymdy jańalyqty jarııa etti. Oblys ákimi Berik Ýálı aımaqta Týrızm basqarmasy qurylatynyn málimdedi.
Mamandardyń aıtýynsha, bul sheshim óńirdiń týrıstik ınfraqurylymyn júıeli túrde damytýǵa, ishki jáne syrtqy týrızmniń órkendeýine serpin bermek. О́ıtkeni qazir óńirdiń eń basty týrıstik nysandarynyń biri – Alakólge degen suranys jyldan-jylǵa artyp keledi. Bul úrdis oblys úshin úlken múmkindikterge jol ashady.
Osy oraıda Abaı oblysynyń ákimi Maqanshy aýdanyna jasaǵan jumys sapary barysynda Alakóldiń jaǵdaıymen tanysyp, týrıstik maýsymǵa daıyndyqty pysyqtady. Alakóldiń ınfraqurylymyn jaqsartý maqsatynda zamanaýı qoqys jáshikterin kóbeıtý, qoǵamdyq ájethanalar sanyn arttyrý, jaǵalaýdy abattandyrý, emdik balshyq aımaǵyn retke keltirý, balalarǵa arnalǵan oıyn alańdaryn salý, órt qaýipsizdigin kúsheıtý sekildi mańyzdy ister qolǵa alynyp jatyr. Bul bastamalar demalýshylar men em alýshylarǵa qolaıly jaǵdaı jasap, týrısterdiń sanyn odan ári arttyrýǵa múmkindik beretini sózsiz.
Buǵan qosa Abaı oblysynyń biregeı tabıǵı jáne tarıhı-mádenı muralaryn qamtıtyn birneshe týrıstik baǵyttary qalyptasyp úlgerdi. Aıtalyq, Besqaraǵaıdaǵy Shoshqaly kóli, Abaı aýdanyndaǵy Qunanbaı áýletiniń qorymy, Qońyr áýlıe úńgiri, Jıdebaıdaǵy «Abaı-Shákárim» kesenesi, Bórilidegi Muhtar Áýezov mýzeı-úıi, Úrjar aýdanyndaǵy «Tarbaǵataı» ulttyq parki, Aıagóz aýdanyndaǵy «Qozy Kórpesh – Baıan sulý» mazary, Maqanshydaǵy «Barlyq Arasan» shıpajaıy, Shúlbi sý qoımasy, taǵysyn-taǵylar. Bul týrıstik nysandar tek ishki ǵana emes, halyqaralyq deńgeıdegi týrısterdiń de qyzyǵýshylyǵyn týdyryp otyr.
Týrızmdi damytý úshin bilikti mamandar daıarlap, qyzmet sapasyn jaqsartý kerek. Oblystaǵy týrıstik kásipkerlikti qoldaý, ınfraqurylymdy nyǵaıtý, ekotýrızmdi damytý óńirdiń ekonomıkalyq ári áleýmettik órleýine yqpal etedi.
Qoryta aıtqanda, Abaı oblysynyń týrızm salasyndaǵy áleýeti zor. Bul salanyń aıasyn keńeıte tússe óńirdiń damýyna septigi mol tıedi. Osy rette týrıstik nysandardy damytýǵa memlekettik qoldaý kórsetilse, jergilikti bılik baǵdarly, belsendi qyzmeti arqyly ólkeni elimizdiń syndarly saıahat ortalyqtarynyń birine aınaldyrýǵa bar kúsh-jigerin jumsaýǵa daıyn.
Abaı oblysy
