Sýret: qyzylqoga.kz
Ekonomıkalyq tergep-tekserý departementiniń Jambyl oblysy boıynsha departamenti basshysynyń orynbasary Nurbol Rahmetovtiń aıtýynsha, kóleńkeli ekonomıkaǵa qarsy kúres Úkimettiń qaýlysyna sáıkes 2023–2025 jyldarǵa arnalǵan keshendi jospar negizinde iske asyrylady. Jalpy alǵanda zańsyz taýar aınalymyn toqtatý maqsatynda óńir boıynsha birqatar jumys atqarylǵan. Qolǵa alynǵan júıeli jumystyń nátıjesinde kórsetkishter ózgergenimen, ońaı oljaǵa qunyqqandardyń áli de bolsa sıreıtinge uqsamaıdy.
«Aksızdeletin ónimderdiń zańsyz aınalymy – óńirdiń ózekti máselesi. Oblysta janar-jaǵarmaı materıaldaryn kórshiles Qyrǵyz Respýblıkasyna zańsyz shyǵarýmen kúres ilki sátke de toqtaǵan emes. Bul máseleni sheshý úshin «Peretok» jedel-profılaktıkalyq is-sharasyn ótkizý algorıtmi ázirlengen. Qolǵa alǵan jumystyń nátıjesinde janar-jaǵarmaı materıaldarynyń kórshi elge shyǵarylýy 65 paıyzǵa azaıdy. Osy baǵyttaǵy jumys aldaǵy ýaqytta da jalǵasady», deıdi departament basshysynyń orynbasary.
N.Rahmetovtiń aıtýynsha, ótken jyly óńir boıynsha 5 mlrd teńgeden asatyn aksızdik ónimderdiń zańsyz aınalymy boıynsha 22 qylmystyq is tirkelgen. Al aksız somasy 2 mlrd teńgeni quraǵan. 7 mln qorap temeki zańsyz aınalymnan tárkilengen. Osylaısha, kóleńkeli kásippen aınalysqandarǵa tosqaýyl qoıylǵan.
«Osy jyldyń alǵashqy toqsanynda da birneshe zańsyzdyq anyqtaldy. Naqtyraq aıtsaq, 6 qylmystyq is tirkeldi. Nátıjesinde, jalpy quny 540 mln teńgeden asatyn 626 myń qorap temeki men 40 myń lıtr spırt tárkilendi», deıdi N.Rahmetov.
Qalaı desek te, zańsyz taýar aınalymyna qarsy kúres kúsheıip turǵany daýsyz. Áıtse de, qunyqqan azamattar ońaı tabys tabý úshin áli de bolsa zańdy belden basýǵa bekinip otyrǵany qaıran qaldyrady. Birneshe jyl buryn kórshi eldiń turǵyndary qazaq janarmaıyna qatty qyzyǵatynyn, Qordaı arqyly óz eline tasymaldap, ústeme baǵamen satatynyn jazǵan edik. Birer jyl buryn munaı ónimderin tasymaldaýda elimiz boıynsha 300-ge jýyq zań buzýshylyq anyqtalyp, 90 myń tonna janarmaı tárkilengen edi. Qazir janarmaıdyń zańsyz shyǵarylymy 65 paıyzǵa azaıǵan. Dese de, zańsyzdyq áli de oryn alyp otyrǵany qynjyltady.
Jambyl oblysy
