Foto: Sý resýrstary jáne ırrıgasııa mınıstrligi
Sý resýrstary jáne ırrıgasııa mınıstrliginiń málimetinshe, Jambyl oblysynyń «Qazsýshar» fılıaly 31 myń gektar egis alqabyn sýarý úshin 107 mln tekshe metrden astam sý bergen. Jetisý oblysynyń sharýalaryna 127 mln tekshe metr sý berilip, 18 myń gektardan astam jer sýarylyp, 11 myń gektardan astam jer ylǵaldandyrylǵan. D.Qonaev atyndaǵy «Úlken Almaty kanaly» fılıaly 5210 gektardy sýarýǵa 33 mln tekshe metr sý bergen.
Qolaıly aýa raıy men sýarmaly sýdyń erte berilgeniniń arqasynda Túrkistan oblysynyń dıqandary sáýirdiń ortasynda qyryqqabattyń alǵashqy ónimin jınady. Al mamyr aıynyń sońǵy onkúndiginde qaýynnyń, maýsym aıynyń alǵashqy aptasynda qarbyzdyń alǵashqy ónimin jınady.
Bıyl «Qazsýshar» fılıaldary sharýalarmen sýarmaly sý berý jóninde 20 402 kelisimshart jasasty. Mınıstrlik «Qazsýshar» fılıaldary mekememen kelisimshartqa otyrǵan sharýalarǵa ǵana sýarmaly sý beretinin eskertken.
«Memleket basshysynyń tapsyrmasyna saı Sý resýrstary jáne ırrıgasııa mınıstrligi sýdyń «kóleńkeli» naryǵymen kúres júrgizip jatyr. Máselen, Aral-Syrdarııa basseındik ınspeksııasynyń mamandary Túrkistan oblysy Shardara aýdanynyń Jaýshyqum sýarý alqabynan tirkelmegen 24 sorǵy qondyrǵysyn anyqtady. Tekserý nátıjeleri tıisti sharalar qabyldaý úshin jergilikti atqarýshy organdarǵa joldandy. Aıta keterligi, jańa Sý kodeksinde bul máselege erekshe kóńil bólinip, sý salasyndaǵy quqyq buzýshylyqtar úshin jaýapkershilik kúsheıtilgen. Qujat 10 maýsymda kúshine enedi», dedi Sý resýrstary jáne ırrıgasııa mınıstrliginiń resmı ókili Almas Musabekov.
Qyrǵyz Respýblıkasymen jasalǵan kelisimge sáıkes, bıylǵy vegetasııalyq kezeńde Shý ózeni arqyly Qazaqstanǵa 180 mln, al Talas ózeni arqyly 400 mln tekshe metr sý keledi dep kútilip otyr. Syrdarııa ózeni arqyly Shardara sý qoımasyna shamamen 3,7 mlrd tekshe metr sý túsedi dep josparlanyp otyr.
Mejeli túrde turaqty sý jetkizýdi qamtamasyz etý maqsatynda, 30 mamyrda Qazaqstan, Tájikstan jáne О́zbekstan arasyndaǵy «Bahrı Tochık» sý qoımasynyń maýsym-tamyz aılaryndaǵy jumys rejımi boıynsha úshjaqty keste bekitilgen. Bul qujat sheńberinde Qazaqstanǵa vegetasııalyq kezeńde Dostyq kanaly arqyly keminde 491 mln tekshe metr sý jiberiledi.
Aıta keteıik, vegetasııalyq kezeńdi qaýipsiz ótkizý maqsatynda «Qazsýshar» fılıaldary 627 shaqyrym ırrıgasııalyq kanaldy mehanıkalyq tásilmen tazalap, 488 gıdrotehnıkalyq qurylysjaıǵa jóndeý jumystaryn júrgizgen. Bıyl jalpy 517 gıdrotehnıkalyq qurylysjaıdy jóndeý jáne 2 myń shaqyrymnan astam kanaldy tazalaý josparlanyp otyr. Bul kórsetkish byltyrmen salystyrǵanda eki ese artyq.
