Foto: ashyq derekkóz
Bul jańashyldyq rásimdelgen poshta jóneltilimderine — ıaǵnı, jaı, tapsyrys hattar men baǵalanǵan sálemdemelerge qatysty. Alaıda aqsha aýdarymdary men tólemmen jiberiletin sálemdemeler bul tizimge kirmeıdi.
Jańa júıe boıynsha, poshta jóneltilimi daıyn bolǵanda alýshynyń baılanys nómirine arnaıy kod jiberiledi.
Alýshy bul kodty úshinshi tulǵaǵa bere alady — mysaly, týysqanyna nemese áriptesine. Olar poshta bólimshesine baryp, QR-kodty skanerleý nemese PIN-kodty operatorǵa aıtý arqyly jóneltilimdi esh qıyndyqsyz ala alady. Qosymsha qujat nemese senimhat qajet etilmeıdi.
-Jóneltilimderdi úshinshi tulǵaǵa berý — PIN-kod nemese shtrıh-kod (QR) arqyly rastaý negizinde júzege asyrylady,- delingen mınıstrlik buıryǵynda.
Alaıda mamandar qaýipsizdikke erekshe mán berýge shaqyrady. QR nemese PIN-kod arqyly alý quqyǵy zańdy túrde alýshynyń jaýapkershiliginde qalady. Iаǵnı, kodty bógde adamǵa berý — tek alýshynyń erkimen jáne senimimen júzege asyrylady.
13 maýsymnan bastap Qazaqstanda poshta alý tártibi sıfrly formatta jańa deńgeıge ótedi. Endi sálemdemeni mindetti túrde ózińiz baryp alýdyń qajeti joq — bul ýaqyt únemdeýge, logıstıka men qyzmet sapasyn arttyrýǵa baǵyttalǵan jańashyldyq.
Mınıstrlik azamattardy jańa erejemen aldyn ala tanysyp, kodty qaýipsiz saqtaý qajettigin eskertedi.
Araılym MYRZAHAN, EUÝ 2 kýrs stýdenti
