Atalǵan mádenı joba alǵash ret 2023 jyly dúnıege kelgen bolatyn. Sol kezde de ár aımaqtan kelgen sýretshilerdiń týyndylary bir alańda toǵysyp, kórme úlken qyzyǵýshylyq týdyrdy. Al bıylǵy bıennaleniń ereksheligi – óńirlerdegi talantty avtorlardyń basyn qosý.
«Bul – biz úshin óte mańyzdy joba. «Qazaq Content» kórmesin bir jyl boıy daıyndadyq. Eki jyl buryn osy ataýmen alǵash ret kórme ótkizgen edik, onda túrli sýretshilerdiń jumystaryn biriktirdik. Bıylǵy ereksheligi – barlyq óńirlerdi aralap, shyǵarmashylyq deńgeıi joǵary, biraq iri galereıalarda kórmege shyǵý múmkindigi shekteýli sýretshilerdi arnaıy tańdadyq. Búgin sizder osy eńbektiń nátıjesin kóresizder», dedi Leıla Mahat.
Kórmege elimizdiń ár óńirinen kelgen birqatar tanymal jáne daryndy sýretshiler qatysty. Atap aıtsaq, Kókshetaý qalasynan Natalıa Býlgakova, Vladımır Bystrıskıı, Dýjan Maǵzumov, Rınat Ábenov, sondaı-aq Aqtóbe qalasynan Ilsýıar Kazakova, Almatydan Oralbek Kaboke, Oral qalasynan Tabıǵat Qojanbaev, Shymkentten Erbol Zııabekov, Qyzylorda qalasynan Ospan Álı bar.
Is-shara aıasynda erekshe oryn alǵan joba – fotograf Ospan Álıdiń «Ğasyr» atty fotokeńistigi boldy. Bul – 1 jastan 100 jasqa deıingi keıipkerlerdi qamtıtyn, zamana men adamnyń ózara baılanysyn kórsetetin aýqymdy kórkem zertteý.
Kýrator Leıla Mahat bul ıdeıanyń qalaı týǵanyn aıtyp ótti. «Ǵasyr» jobasy alǵash oıyma ushaqta otyrǵanda keldi. Astanaǵa kelgen boıda bul ıdeıany fotograf Ospan Álıge aıttym. Alǵashynda ol tańǵaldy. Biraq kóp uzamaı Qazaqstannyń túkpir-túkpirin aralap, 1 jastan 100 jasqa deıingi túrli jastaǵy keıipkerlerdi fotoobektıvke túsirýge kiristi», dedi ol.
Fotograf Ospan Álı atalǵan serııany jasaqtaýdyń ońaı bolmaǵanyn tilge tıek etti.
«Bul jobany júzege asyrý ońaı bolǵan joq. Elimizdiń ár óńirinen ártúrli adamdardy kezdestirdim. Olardyń árqaısysynyń ómirge degen kózqarasy, ishki kúıi – múlde bólek. Muny fotosýretterden anyq baıqaýǵa bolady. Biz dál qazir osy ǵasyrdamyz. Bul – bizdiń ǵasyrymyz. Bul adamdar – bizdiń ultymyzdyń bet-beınesi», deıdi avtor.
Joba dástúrli kórme formatymen ǵana shektelmeı, jasandy ıntellekt kómegimen arnaıy jazylǵan án men sıfrlyq elementtermen tolyqtyryldy.
Jibek BOLYSBEK,
L.N.Gýmılev atyndaǵy EUÝ-dyń 3-kýrs stýdenti
