Oǵan Sybaılas jemqorlyqqa qarsy is-qımyl agenttigi Prevensııa qyzmetiniń asa mańyzdy ister jónindegi ofıseri, sybaılas jemqorlyqqa qarsy qyzmet polkovnıgi Jazıra Jylqyshıeva jáne seriktestiktiń basshylyq quramy men jýrnalıster qatysty.
«Qazaq gazetteri» seriktestiginiń bas dırektory Dıhan Qamzabekuly jınalysty ashyp, kezdesýdiń maqsat-muratyn aıtyp ótti. Sondaı-aq bul basqosý jemqorlyqqa qarsy kúres, onyń aldyn alý is-sharalarynyń jospary aıasynda uıymdastyrylyp otyrǵanyn jetkizdi.
Polkovnık Jazıra Jylqyshıeva jýrnalısterge jıynnyń maqsatyn túsindirip, qoǵamnyń «jegi qurty» sanalǵan jemqorlyqtyń memleketke keltirer zııany týraly aıtyp ótti. Aldymen ol sybaılas jemqorlyqqa qarsy is-qımyldyń quqyqtyq negizderine toqtaldy.
– Bizdegi jeń ushynan jalǵasqan sybaılas jemqorlyqqa qarsy is-qımyldyń quqyqtyq negizderi eń aldymen «Sybaılas jemqorlyqqa qarsy is-qımyl týraly» zańnan bastaý alady. Bul zań 2016 jyldyń 1 qańtarynan bastap qoldanysqa engizilgen. Sondaı-aq Memleket basshysynyń Jarlyǵymen qabyldanǵan «2022–2026 jyldarǵa arnalǵan sybaılas jemqorlyqqa qarsy is-qımyl tujyrymdamasynyń» da 61 tarmaqtan turatyn jospary bar. Búgingi tańda osy tujyrymdama josparynyń basym bóligi oryndaldy. Iаǵnı búgingi sybaılas jemqorlyqqa qatysty zańnamalyq ózgerister men tolyqtyrýlar sol strategııalyq qujat aıasynda júzege asyrylyp jatyr, – dedi J.Jylqyshıeva.
Jazıra Jaqsylyqqyzy sondaı-aq sybaılas jemqorlyq táýekelderi úderisin, onymen kúrestiń jańashyl tásilderin túsindirip berdi.
– Zańda belgilengen ákimshilik nemese qylmystyq jaýaptylyq, sybaılas jemqorlyq belgileri bar, quqyqqa qaıshy is-árekettiń bári sybaılas jemqorlyq bolyp sanalady. Sybaılas jemqorlyqqa qarsy zańnamany jetildirý 1998 jyly TMD elderi arasynda eń alǵash bizdiń elde qolǵa alyndy. 2015 jylǵa deıin kóbine jazalaý quqyqtyq sharalaryna basymdyq berilgen. Al qazirgi zańnamada aldyn alý, prevensııa sharalary negizgi basymdyqqa ıe, – deıdi Jazıra Jaqsylyqqyzy.
Sonymen qatar sybaılas jemqorlyqqa qarsy qyzmet mamany búginde osy baǵyttaǵy zań normalary odan ári kúsheıtilip, ıaǵnı kináli tulǵany bas bostandyǵynan aıyrý jazalary da qarastyrylǵanyn atap ótti.
Jıyn barysynda Jazıra Jaqsylyqqyzy jýrnalıster suraqtaryna jaýap berip, sybaılas jemqorlyqpen kúres tóńireginde qalyptasqan qoǵamdyq pikirge dáıekti kózqarasyn bildirdi.
