ALMATY. 6 mamyr. «Egemen Qazaqstan» gazetiniń Almaty qalasynda turatyn maıdandaǵy jáne tyldaǵy ardagerlerine redaksııa tarapynan arnaıy qurmet kórsetildi. Marapat alǵandardyń ishinde belgili jazýshy-jýrnalıst Qalmuqan Isabaev, Bısultan Amanǵalıev jáne Bostandyq aýdandyq ardagerler keńesiniń tóraǵasy, tyl ardageri Hamıt Birjanov bar. Bul týraly egemen.kz habarlady.
El basyna kún týǵanda qanshama bozdaq qalamyn qarýǵa aıyrbastap, qan maıdanǵa attandy?! Qanshama qyrshyn jas Otan úshin maıdan dalasynda opat boldy, jaýyn jeńgenderi elge aman oraldy. Uly Otan soǵysynyń tarıhynda «Sosıalıstik Qazaqstan» («Egemen Qazaqstan») gazetiniń maıdanger jýrnalısteriniń esimderi de «altyn árippen» jazylǵan. Ár jyldar bederindegi «Sosıalıstik Qazaqstannyń» sarǵaıǵan betterinde qoltańbalary qalǵan ardaqty ardagerler redaksııamen aradaǵy baılanysyn eshqashan úzgen emes. Elimizdiń bas gazeti «Egemenniń» búgingi tynys-tirshiliginen habardar, zamana úndesýlerinen qulaǵdar bolyp otyrady.
Bostandyq aýdanynyń ákimdiginde ótken ardager-jýrnalısterdi marapataý rásiminde basylymnyń Almaty bólimshesiniń jetekshisi Qorǵanbek Amanjol Astanadaǵy redaksııa basshylyǵynyń atynan quttyqtaý hat oqyp, gazet ardagerlerine gúl shoqtary men aqshalaı syıaqy tabys etti. Qart qalamgerlerge uzaq ta baqytty ǵumyr tiledi. Sondaı-aq, aýdan ákiminiń orynbasary S. Mánizorov ardagerlerdi aıtýly merekemen quttyqtady.
О́z kezeginde maıdangerler de bas basylymǵa syı-qurmeti úshin alǵys aıtty.
Talǵat Súıinbaı.
Derek, sýret: egemen.kz.
