ORAL. 6 mamyr. Batys Qazaqstan oblysynyń ortalyǵy - Oral qalasynyń úsh jas dombyrashysy Chehııa astanasy – Pragada ótkizilgen balalar men jasóspirimder arasyndaǵy VII halyqaralyq festıval-baıqaýdyń jeńimpazdary atandy. Bul týraly egemen.kz tilshisi habarlady.
Baıqaýǵa álemniń birneshe elinen jas shamalary 5 pen 20-nyń arasyndaǵy 300-den astam balǵyn mýzykanttar qatysty. Atalǵan synda el namysyn qorǵaǵan Oral qalasyndaǵy №11 daryndy balalarǵa arnalǵan mekteptiń janyndaǵy óner mektebiniń oqýshysy Malıka Ahmetova qazaq dombyrasymen eýropalyqtardy tańyrqatty.
Malıka eki shyǵarma oryndady. Birinshisi, belgili Brazılııa kompozıtory Zekını de Abreýdiń «Tıso-tıso» shyǵarmasy bolsa, ekinshisi, qazaq kompozıtory Ermurat Úsenovtiń «Jalqy jigit» atty týyndysy. Qazylar alqasy halyqtyq mánerde oryndalǵan qazaqstandyq jas órenniń ónerin joǵary baǵalap birinshi oryn berdi.
Eýropa júreginde qazaq dombyrasynyń únimen eýropalyqtardy tánti etkenderdiń qatarynda Oral mýzyka kolledjiniń tórtinshi kýrs stýdenti Arhat Stamǵazy da bar. Onyń repertýarynda Nurǵısa Tilendıevtiń «Aqqý» kúıi men Ábilahat Espaevtiń «Bógelegi» bar. Arhat ta birinshi orynnyń tuǵyrynan tabyldy.
Halyqaralyq baıqaýdyń shyńyn baǵyndyrǵan úshinshi mýzykantymyz – Erjan Qumarǵalıev. Ol – oblys ortalyǵynan shalǵaıda jatqan Qaztalov aýdanyndaǵy Aqpáter mýzyka mektebiniń oqýshysy.
Osylaısha oraldyq úsh mýzykant talǵamy bıik, shoqtyǵy joǵary eýropa kórermenderine qazaqtyń qara dombyrasynyń qudiretin tanytty. Sóıtip, Praga sahnasynda Qazaqstannyń týy jelbiredi. Jaraısyńdar, jas órender – Malıka, Arhat jáne Erjan!
Temir Qusaıyn.
Derek, sýret: egemen.kz.
