Elimizdiń Premer-Mınıstri atynan barlyq mal sharýashylyǵy qyzmetkerlerin kásibı merekelerimen Premer-Mınıstrdiń orynbasary – Ulttyq ekonomıka mınıstri Serik Jumanǵarın quttyqtady.
«Memleket basshysynyń tapsyrmasyna sáıkes, elimizdiń agroónerkásiptik keshenin damytýǵa jan-jaqty qoldaý kórsetilip keledi. Mal sharýashylyǵy salasyndaǵy janqııarlyq eńbek nátıjesinde qazaqstandyqtar sapaly ári tabıǵı ónimge qol jetkizýde, al agrarlyq ekonomıkanyń áleýeti artyp otyr. Mal sharýashylyǵy óńdelgen ónim úlesin arttyrýda jáne aýyl turǵyndaryn jyl boıy turaqty jumyspen qamtýda mańyzdy ról atqarady. Bul saladaǵy barlyq jetistikter – eń aldymen, malshylardyń aýyr ári adal eńbeginiń nátıjesi. Úkimet bul salany damytýǵa aldaǵy ýaqytta da basymdyq berýdi jalǵastyrady», – dep atap ótti vıse-premer.
Qazaqstan Respýblıkasy Aýyl sharýashylyǵy mınıstri Aıdarbek Saparov óz sózinde mal sharýashylyǵy – bul tek ekonomıkalyq sala ǵana emes, sonymen qatar eldiń tarıhy, mádenıeti jáne aýyl ómir saltymen tyǵyz baılanysty ulttyq biregeıliktiń bir bóligi ekenin atap ótti.
«Prezıdent 2025 jyldy Qazaqstanda Jumysshy mamandyqtar jyly dep jarııalady. Bul – naqty ekonomıkany quryp, búkil qoǵamnyń tiregin qalyptastyratyn eńbektiń mańyzdy rólin moıyndaý bolyp tabylady.
Mal sharýashylyǵy – aýyl sharýashylyǵynyń negizgi jáne eń kóp eńbek sińirýdi qajet etetin salalarynyń biri. Bul sala kásibı daǵdylarmen qatar, joǵary deńgeıdegi ózin-arnaýdy talap etedi. Ol azyq-túlik qaýipsizdigine, aýyldyq óńirlerdegi jumyspen qamtýǵa jáne agroónerkásip kesheniniń aralas baǵyttarynyń damýyna tikeleı áser etedi.
2024 jyldyń qorytyndysy boıynsha mal sharýashylyǵynyń jalpy ónim kólemi 3,3 trln. teńgeni qurap, ótken jylmen salystyrǵanda 3,6%-ǵa ósti. Osyǵan baılanysty agroónerkásip kesheniniń strategııalyq mańyzy bar bul salanyń damýyna eleýli úles qosyp kele jatqan Túrkistan, Pavlodar, Soltústik Qazaqstan jáne Aqmola oblystaryn erekshe atap ótkim keledi. Bul óńirler óndiris kólemi boıynsha turaqty túrde aldyńǵy qatarda keledi», – dedi Aıdarbek Saparov.
Aıta keteıik, 2020 jylǵa deıin elde jyl saıyn eki taýarlyq-sút fermasy (TSF) iske qosylatyn bolsa, Soltústik Qazaqstan oblysynyń tájirıbesin taratý baǵdarlamasy aıasynda 2024 jyly 39 zamanaýı TSF iske qosylyp, taǵy 46-sy qurylys satysynda tur. Aldaǵy 2–3 jylda TSF sany 115-ke jetip, qosymsha 600 myń tonnadan astam sút óndirý múmkindigi paıda bolady.
Qoldaý sonymen qatar etti iri qara ósirý, qus sharýashylyǵy, qoı sharýashylyǵy, túıe jáne jylqy sharýashylyqtaryn da qamtıdy. Asyl tuqymdy mal basyn satyp alýǵa jáne aınalym qarajatyn tolyqtyrýǵa jyldyq 5% mólsherlememen qoljetimdi qarjylandyrý quraldary engizildi.
Basty basymdyqtardyń biri – tuqymdyq resýrstardy damytý bolyp qala beredi. 2025 jyly 75 jyldyǵyn atap ótetin qazaqtyń aqbas sıyry – turaqtylyqtyń, ónimdiliktiń jáne ulttyq maqtanyshtyń sımvolyna aınaldy. Bul tuqym sátti eksporttalyp, halyqaralyq deńgeıde básekege qabilettiligin dáleldep otyr.
Májilistiń Agrarlyq máseleler komıtetiniń tóraǵasy Serik Egizbaev pen Qazaqstannyń Eńbek Eri, Aýyl sharýashylyǵy mınıstrligi janyndaǵy Qoǵamdyq keńestiń tóraǵasy Gennadıı Zenchenko eldiń azyq-túlik turaqtylyǵyn qamtamasyz etip, qazaq mal sharýashylyǵynyń ǵasyrlyq dástúrin jalǵastyryp kele jatqan sala mamandaryn quttyqtady.
Premer-Mınıstrdiń atynan 17 salanyń ókiline Qurmet gramotalary tabystaldy.
