Baıanaýyl ulttyq parki
Baıanaýyl ulttyq parkiniń ǵylymı qyzmetkerleri Toraıǵyr kóliniń soltústik-shyǵysyndaǵy tastaq jerlerden qaraqurt jumyrtqalaryn tapqanyn málimdedi. Demek jaz maýsymynda qaýipti jándiktiń qaıta shyǵý yqtımaldylyǵy bar.
– Tastar arasynda ýly órmekshilerdiń jumyrtqalary bary anyqtaldy. Jándikter qysta tastardyń qýysyna kirip jan saqtaıdy da, kún jylyna jer betine shyǵady. Aıryqsha qorǵalatyn jer bolǵan soń, park aýmaǵynda hımııalyq óńdeýge ruqsat joq. Jumyrtqalaryn qolmen jınap, qutyǵa salyp órtep jiberemiz. Byltyr shamamen 30 ga jerde osyndaı is-sharalardy atqarǵanbyz. Aldaǵy aptalarda mamandarymyz jumyrtqalardy joıýǵa qaıta kirisedi. Sondaı-aq Toraıǵyr aýyldyq okrýginiń ákimdigine eskertý hat jiberdik. Olar ózderine tıesili jerlerdi óńdeýi kerek, – deıdi ulttyq parktiń ǵylym jáne monıtorıng bóliminiń ǵylymı qyzmetkeri Murat Jasulan.
Qaraqurt osymen ulttyq parkten úshinshi jyl qatarynan tabylyp otyr. Qyzmetkerler 2023 jyly 1593 jumyrtqa men qaraqurttyń 356 urǵashysyn jınap, joısa, byltyr 523 jumyrtqa men 124 urǵashysy órtelgen.
Baıanaýyl aýdanynyń ákimi Ardaq Kisentaevtyń aıtýynsha, Toraıǵyr aýyldyq okrýgine qarasty jerlerdiń biraz bóligi (Ulttyq parkke tıesili emes jerler) qaraqurtqa qarsy hımııalyq óńdeýden ótedi.
– Bul maqsatqa bıýdjetten 1,8 mln teńge bólinip, merdiger tańdalyp qoıdy. О́tken jyly tamyz aıynda qaraqurt qaptap ketýine baılanysty tótenshe jaǵdaı rejimin jarııalaýǵa májbúr bolǵanbyz. Bıyl erte qamdandyq. О́ńdeý is-sharalaryn eki ret júrgizý qarastyrylǵan. Byltyr 150 ga jer óńdelse, bıylǵy shama da sodan kem bolmaıdy, – dedi A.Kisentaev.
Qaraqurt adamǵa óte qaýipti. Dárigerler eger qaraqurt shaǵyp alsa, birden medısınalyq kómekke júgingen abzal deıdi. Medısınalyq kómek kelip jetkenshe qaraqurt shaqqan jerdi 2-3 mınýt kúıdirýge bolady. Ol jándiktiń ýly áserin joıady.
Pavlodar oblysy,
Baıanaýyl aýdany,
Toraıǵyr aýyly
