Elde eń suranysqa ıe baǵyttarǵa qyzyǵýshylyqtyń aıtarlyqtaı artqany baıqalady: generatıvti JI kýrstaryna tirkelý 383 paıyzǵa, kıberqaýipsizdik kýrstaryna qyzyǵýshylyq 80 paıyzǵa, synı oılaý kýrstaryna qyzyǵýshylyq 43 paıyzǵa, kásibı sertıfıkattardy alý 50 paıyzǵa artqan. Qazaqstan sıfrlyq ınklıýzııa deńgeıiniń joǵarylyǵymen erekshelenedi: bilim alýshylardyń 56 paıyzyn áıelder quraıdy, al 62 paıyzy oqýdy mobıldi qurylǵylar arqyly alyp jatyr. Bul oqytýdyń turǵylyqty jerine qaramastan qoljetimdi ekenin kórsetedi.
Mundaı nátıjelerge QR Ǵylym jáne joǵary bilim mınıstrligi úılestiretin Coursera Qazaqstan ulttyq bastamasyn iske asyrý arqyly qol jetkizildi. Aıtalyq, Coursera jobasyna 2023 jyly elimizdiń 25 joǵary oqý orny, 2024 jyly 93 joǵary oqý orny qatyssa, 2025 jyly 95 joǵary oqý orny qatysty. Stýdentterge álemniń jetekshi ýnıversıtetteri men kompanııalarynyń 14 000-nan astam kýrsy qoljetimdi boldy. Mınıstrlikten berilgen lısenzııalar aıasynda úsh jylda platforma arqyly 167 372 stýdent oqýdan ótti, 288 347 sertıfıkat berildi. 2025 jyly AI Sana jobasy aıasynda jasandy ıntellekt boıynsha jeke trek iske qosylyp, onyń sheńberinde 47 399 sertıfıkat tabystaldy. Bul derekter onlaın oqytýdyń jáne mıkroquzyretterdiń jańa ekonomıka kadrlaryn daıarlaýdaǵy, sondaı-aq Qazaqstannyń joǵary bilim berý júıesin ornyqty damytýdaǵy strategııalyq mańyzyn dáleldeıdi.
Aıta keteıik, esepte bilim alýshylardyń minez-qulyq derekteri men makroekonomıkalyq kórsetkishterdi biriktiretin jańa 3.0 ádistemesi qoldanylǵan. Bul kórsetkishterge adamı kapıtal ındeksi, eńbek naryǵyna qatysý deńgeıi, jan basyna shaqqandaǵy JIО́ jáne Jahandyq ınnovasııalyq ındeksi jatady. Sonymen qatar Coursera derekteri men Halyqaralyq valıýta qory, EYDU sııaqty halyqaralyq derekkózder negizinde elderdiń jasandy ıntellektini engizýge daıyndyǵyn baǵalaıtyn AI Maturity Index alǵash ret usynyldy.
