2024 jyly Býrabaıǵa kelgen qonaqtar sany 355 myńnan asyp, ótken jylmen salystyrǵanda 14 paıyzdan artyq bolǵan. Bul — týrızmniń el ishindegi tartymdylyǵy artyp kele jatqanynyń belgisi. Qazirdiń ózinde aýdanda 217 týrıstik nysan jumys istep tur. Bul san aldaǵy ýaqytta artady dep kútilýde, óıtkeni jańa jobalar qolǵa alynǵan.
Bıyl jazda taǵy 5 iri ınfraqurylymdyq joba iske qosylady. Olardyń qatarynda Býrabaı kentinde serýen aımaǵy, Shýche kóliniń jaǵajaıyn jańartý, jyly ájethanalar ornatý jáne 119 «aqyldy» beınekamera ornatý jumystary bar. Sonymen qatar, Shýchede baıqaý (smotrovaıa) alańy ashylady.
Kýrortqa qatynaıtyn qoǵamdyq kólik máselesi de sheshimin taýyp keledi. Vokzaldan Býrabaıǵa deıingi marshrýt iske qosylyp, bılet baǵasy qoljetimdi etilgen: qala ishinde – 110 teńge, Býrabaıǵa – 250 teńge. Jolaýshylar úshin jaǵdaı jasaý maqsatynda avtoparkke jańa avtobýstar satyp alynǵan: 2024 jyly – 6, bıyl taǵy 4 avtobýs qosylady.
Tabıǵatty aıalaý — basty ustanym. Osy jazda Shýchede qatty turmystyq qaldyqtardy suryptap, qaıta óńdeıtin keshenniń qurylysy bastalady. Bul joba «Eko-Dump» kompanııasymen birlese atqarylyp jatyr. Qýattylyǵy – 40 myń tonna. Sonymen qatar, 9 zamanaýı qoqys kóligi (onyń úsheýi – elektrli), 10 klımattyq kamera men arnaıy qaldyq jınaý júıesi qarastyrylǵan.
Aýdanda qazir 6 myńǵa jýyq shaǵyn jáne orta bıznes ókili jumys isteıdi. 14 myńnan astam adam osy salada eńbek etýde. Bıyldyń ózinde 450 mıllıon teńgege 14 joba júzege asyrylǵan. Jyl basynan beri 15 mıllıard teńgeden astam ınvestısııa tartylǵan, onyń ishinde 12 mıllıardy – jeke qarjy. Qazir júzege asyp jatqan 36 joba aıasynda myńnan asa jańa jumys orny ashylmaq. Bul jobalar týrızmnen bastap, aýyl sharýashylyǵy, saýda, avtoservıs jáne sport salalaryn qamtıdy.
Aýdan ákimdiginiń dereginshe, sońǵy úsh jylda aýdan bıýdjeti eki ese ulǵaıyp, 12,8 mıllıard teńgege jetken. Al 2025 jyldyń alǵashqy 4 aıynyń ózinde bıýdjetke 23,1 mıllıard teńge túsken. Onyń ishinde aýdan bıýdjetine túsetin tabys – 4,7 mıllıard teńge, bul byltyrǵydan 700 mıllıonǵa kóp.
Týrızm salasynyń aýdan bıýdjetine bereri de zor: bıyl alǵashqy toqsanda 1 mıllıard teńgege jýyq kiris túsken. Bir týrısten túsetin salyq 13 myń teńgeden asqan.
Býrabaı men Shýche jaı ǵana demalys orny emes, ol el ishindegi ekonomıkalyq qozǵaýshy kúshke aınalǵan týrızm ortalyǵy. Tabıǵattyń sulýlyǵyn saqtaı otyryp, zamanaýı qyzmet pen ınfraqurylymdy damytyp jatqan óńir naǵyz úlgi bola alady. Bul maýsymda jolyńyz tússe, Býrabaıǵa baryp kórińiz jańarǵan kýrorttyń jańa kelbeti sizdi beı-jaı qaldyrmaıdy.
