Foto: aikyn.kz
Talapkerlerdiń 74%-y testileýdi qazaq tilinde, 26%-y orys tilinde jáne 136 adam aǵylshyn tilinde tapsyrǵan.
Úshinshi aptanyń qorytyndysy boıynsha talapkerlerdiń 69%-y shekti ball jınaǵan. Bes pán boıynsha ortasha ball 65-ti qurady. Eń joǵary 140 balldy Túrkistan oblysynyń túlegi Ábilhan Jánibek birinshi aptada tirkegen.
Qazirgi tańda testke qatysýshylardyń basym bóligi, atap aıtqanda, 18%-y «Matematıka-Fızıka», 15%-y «Bıologııa-Hımııa» pánder kombınasııasyn tapsyrdy. 14%-y «Shyǵarmashylyq emtıhan» kombınasııasyn tańdaǵan.
Erekshe bilim berý qajettilikteri bar oqýǵa túsýshiler úshin de qolaıly jaǵdaı jasaýdyń arqasynda UBT-ǵa 477 talapker qatysqan.
Talapkerler test tapsyrmalarynyń mazmuny boıynsha testileý aıaqtalǵannan keıin 30 mınýt ishinde apellıasııaǵa bere alady. Tehnıkalyq sebepter boıynsha apellıasııa tikeleı testileý kezinde qabyldanady. Nátıjeleri bar sertıfıkattar apellıasııa qarastyrylǵannan keıin jeke kabınette qoljetimdi bolady.
UBT ótip jatqan úsh aptada 206 ereje buzýshylyq anyqtalǵan. 98 talapker smartfondardy, shpargalkalardy jáne basqa da tyıym salynǵan zattardy alyp kirmek bolǵany úshin testileýden shettetilgen. Taǵy 108 adam testileý kezinde erejelerdi buzǵany úshin aýdıtorııadan shyǵarylyp, nátıjeleri joıylǵan. О́zge adamdardyń ornyna kirý faktileri anyqtalǵan joq.
2025 jylǵy UBT aıaqtalǵannan keıin kúntizbelik jyldyń 31 qazanyna deıin beınejazbalarǵa taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda UBT nátıjeleri joıylady.
Negizgi UBT 7-shildede aıaqtalady.
