Shý qalasynda ótken saltanatty sharaǵa Jambyl oblysynyń ákimi Erbol Qarashókeev, Qazaqstannyń Fransııadaǵy Tótenshe jáne О́kiletti Elshisi Gúlsara Arystanqulova, QR Kólik mınıstrligi men «Qazaqstan temir joly» UK» AQ ókilderi jáne joba jetekshileri qatysty.
– Jambyl oblysy úshin asa mańyzdy oqıǵanyń kýási bolyp otyrmyz. Shý aýdanynda jańa deponyń ashylýy elimizdiń temirjol ınfraqurylymyn damytýǵa jáne tranzıttik áleýetin nyǵaıtýǵa zor serpin beretini anyq, – dedi oblys ákimi quttyqtaý sózinde.
Erbol Qarashókeev Memleket basshysynyń tapsyrmasyna sáıkes oblysta aýqymdy ınvestısııalyq jobalar tabysty júzege asyp jatqanyn atap ótti. Sonymen qatar bıznes qaýymdastyqtyń óńirdiń ekonomıkalyq áleýetine degen senimi joǵary ekenin jetkizdi.
Jambyl oblysynyń ınvestısııalyq qorjynynda jalpy quny 3,7 trln teńgeni quraıtyn, 2025-2028 jyldar aralyǵynda júzege asyrylatyn 62 joba bar. Onyń ishinde bıyl 175,2 mlrd teńgege 30 joba iske qosylyp, 1000-nan astam jańa jumys orny ashylady dep josparlanýda.
Temirjol deposynyń qurylysyn Fransııanyń jetekshi kompanııalarynyń biri – Alstom eki jyl ishinde tabysty aıaqtady. Jobanyń jalpy ınvestısııa kólemi 4 mlrd teńgeden asady. Nysan iske qosylǵannan keıin jergilikti turǵyndar úshin 100 jańa jumys orny ashylady dep kútilýde.
Jańa depo «Qazaqstan temir joly» UK» AQ paıdalanatyn KZ4 jáne KZ8 elektrovozdaryna tehnıkalyq qyzmet kórsetýge arnalǵan. Bul joba óńirdiń áleýmettik-ekonomıkalyq damýyna eleýli úles qosady dep kútilýde.
Kásiporyn qyzmeti halyqaralyq standarttarǵa tolyq sáıkes júzege asyrylady. Mamandardyń aıtýynsha, munda ónerkásiptik jáne ekologııalyq qaýipsizdik talaptary qatań saqtalady. Zamanaýı qural-jabdyqtarmen jabdyqtalǵan depo aı saıyn 120-ǵa jýyq, jylyna 1 500-ge jýyq elektrovozdy sapaly jóndeýden ótkizýge qaýqarly.
Qazaqstannyń Fransııadaǵy Tótenshe jáne О́kiletti Elshisi Gúlsara Arystanqulova eki el arasyndaǵy berik strategııalyq áriptestik aıasynda birlesken jobalardyń sátti júzege asyp jatqanyn atap ótti.
Alstom kompanııasynyń Batys jáne Orta Azııadaǵy basqarýshy dırektory Jerom Boıe Qazaqstan tarapynan kórsetilgen senim men ekijaqty yntymaqtastyq úshin alǵysyn bildirdi.
Oblys ákimi qonaqtarmen birge kásiporyndy aralap, jumysyna tabys tiledi.
