Sýretti túsirgen – Aqádil Rysmahan
Oblys ákimdigi bilim basqarmasynyń basshysy Nurbek Orshybekovtiń aıtýynsha, óńirdegi 1-10 synypta oqıtyn 217 757 oqýshynyń 193 067-si ıaǵnı, 88,6 paıyzy jazǵy saýyqtyrýmen qamtylady eken. Qala syrtyndaǵy lagerlerde 7669 bala, mektep janyndaǵy lagerlerde 33 607 oqýshy, mekteptiń demalys alańdarynda 147 271 bilim alýshy, kıiz úı men shatyrly lagerlerde 3 505 jasóspirim, respýblıkalyq lagerlerde 315, ata-analar men kásipodaq uıymdary esebinen 700 oqýshy jazǵy saýyqtyrý sharalarymen qamtylady eken.
«О́ńirdegi 12 qala syrtyndaǵy saýyqtyrý lageriniń 7-eýi bıylǵy maýsymda balalardy qabyldaý boıynsha daıyndyq jumysyn júrgizip jatyr. Onyń ishinde «Móldir bulaq» oqý-saýyqtyrý ortalyǵy jyl boıy jumys isteıtinin aıta ketken jón. Qalǵan altaýy – maýsymdyq lager.
Olardyń ishinde «Balaýsa», «Juldyz», «Juryndysaı» lagerleri memlekettik mekemeler sanatyna jatsa, «Bolashaq», «Berikqara», «Taý samaly» lagerleri jekemenshik sanalady. Munda kópbalaly otbasylardyń jáne ata-ana qamqorlyǵynsyz qalǵan 7669 bala saýyqtyrylady», deıdi N. Orshybekov.
Basqarma basshysy keltirgen derekten óńirdegi 12 lagerdiń 5-eýi balalardy qabyldamaıtynyn bilip otyrmyz. О́ńirde 10 aýdan bar ekenin eskersek, 7 lager az sekildi kórinedi. Birer jyl buryn «Shýdyń balalary qashanǵa deıin Jýalyda demalady?» degen maqala jazǵan edik. Qaıta sol 2022 jyly óńirdegi 11 syrtqy lagerdiń 8-i kestege sáıkes jumys istegen bolatyn. Al bıyl 12 lagerdiń tek jeteýi balalardy qabyldaýǵa daıyndyq jumysyn júrgizgeni kóńilge qaıaý túsiretin sekildi.
Jyl jylystaǵan saıyn oqýshylardy qala syrtyndaǵy jazǵy saýyqtyrý lagerimen qamtý jumysy arta túse me desek, lagerdiń sany kemigeni oılandyrmaı qoımaıdy. Endi tek jumys isteýge belsenip otyrǵan lager basshylary balalardyń jazǵy saýyqtyrý is-sharalaryn oıdaǵydaı ótkizse degen tilegimiz bar.
Bir qýanyshtysy, osy oqý jylynda ozat oqýshylar sanatyna engen bilim alýshylar jaýapty basqarmanyń nazarynan tys qalmapty. Olar túrli lagerlermen qamtamasyz etiledi. Sonymen qatar 21 myńnan astam jasóspirim jergilikti jerdegi tarıhı-mádenı oryndardy aralaıdy. Bir sózben aıtqanda, tarıhy myńjyldyqtarmen astasyp jatqan shaharǵa ekskýrsııa jasaý arqyly balalardyń tanym kókjıegin keńeıtýge basymdyq berilmek.
«Osy oqý jylynda úzdik úlgerimimen kózge túsip, túrli baıqaýlarda top jarǵan 793 bilim alýshy «Qazaqstan halqy» qorynyń qoldaýymen qala syrtyndaǵy lagerlerde demalady. Sonymen qatar 5-9 synypta oqıtyn, respýblıkalyq jáne óńirlik deńgeıdegi baıqaýlarda úzdikter qatarynan kóringen 295 bilim alýshy «Baldáýren» respýblıkalyq oqý-saýyqtyrý ortalyǵyna, kópbalaly otbasylardan shyqqan 20 oqýshy Almaty qalasyndaǵy «Bóbek» saýyqtyrý ortalyǵyna barady», deıdi oblys ákimdigi bilim basqarmasynyń basshysy.
Balalardyń jazǵy saýyqtyrýyn uıymdastyrý jumysy endi ǵana bastalyp jatqany belgili. Birer jyl buryn qala syrtyndaǵy keıbir lager bul isti tıisti deńgeıde úılestire almaǵan bolatyn. Olardyń biri kórshiles Qyrǵyz Respýblıkasynan alatyn elektr energııasyna qatysty jumysty júıelemese, endi biri kúrdeli jóndeý jumysyna baılanysty oraıy kelgen jumysty oryndaı almaǵan edi.
Qalaı desek te balalardyń jazǵy demalysy qyzatyn shaq endi bastalady. Oqýshylar jazǵy lagermen qaı deńgeıde qamtylǵany, qaı lagerlerdiń jumysty qandaı deńgeıde uıymdastyryp jatqany nazarymyzdan tys qalmaq emes.
Jambyl oblysy
