Foto: Daniel Cole/REUTERS
Kalıfornııada bastaý alǵan demonstrasııalarǵa Nıý-Iork, Tehas, Djordjııa jáne Kentýkkı sııaqty ózge de shtattardan turǵyndar qosyldy. Nıý-Iorktegi Trump Tower ǵımaratynyń aldynda ótken shaǵyn mıtıng barysynda sherýshiler «Mıgranttardy qaıtaryńdar!» dep urandatty.
Qalada narazylyq sharalary kezinde birneshe adam tutqyndaldy.
Nıý-Iork ákimi Erık Adams «H» áleýmettik jelisinde zorlyq-zombylyqqa jol bermeý qajettigin eskertip: «Nıý-Iork – beıbit narazylyq ótkizýge bolatyn qala, biraq biz tártipsizdik pen zańsyzdyqqa tózbeımiz», dedi.
Munymen qatar Tehastyń Dallas qalasynda 400-ge jýyq adam mıtıngke shyqsa, Ostın qalasynda da júzdegen turǵyn sherýge qatysqan. Kentýkkıdiń Lýısvıll qalasynda «birneshe júz» adam ortalyq alańǵa jınalyp, Djordjııa shtatyndaǵy Atlanta qalasynda AQSh-tyń Kóshi-qon jáne keden qyzmeti (ICE) keńsesiniń aldyna ondaǵan adam jınaldy.
Aıta keteıik, Kalıfornııadaǵy tártipsizdikter ICE mekemesiniń osy óńirde júrgizgen antımıgrasııalyq reıdterinen keıin órship ketken. Los-Andjeles mańynda bir apta ishinde 118 adam mıgrasııalyq zańnamany buzdy degen kúdikpen ustalǵan.
9 maýsym kúni San-Fransısko qalalyq polısııasy (SFPD) 60-qa jýyq adamdy ustaǵanyn málimdedi. Bastapqyda beıbit sıpatta ótken narazylyq jıynynyń barysynda sherýshilerdiń áreketi agressııaǵa ulasqan. Quqyq qorǵaý organdary «qoǵamdyq tártipti buzý, shabýyl jasaý, múlikti búldirý syndy quqyqbuzýshylyqtar» tirkelgenin habarlady. Osydan keıin sherýdi zańsyz dep jarııalaǵan. Sol kúni Los-Andjeles polısııasy da 56 adamnyń tutqyndalǵanyn rastady.
