Foto: Tolǵanaı Batyrhan
Ulttyq statıstıka bıýrosynyń san deregine súıensek, Astana tazalyǵyn saqtaýǵa 31 mekeme men kásiporyn jumylady. Solardyń ishinde qalanyń 40 paıyzǵa jýyǵynda sanıtarlyq talaptyń toqyramaýyn «Astana Tazalyq» JShS qamtyp otyr. 2008 jyly negizi qalanǵan seriktestikte resmı 1664 adam ter tógip júr. Bul san maýsymdyq jumys tusynda kóbeıe túsedi. Mekeme mamandarynyń jumys kúni de ózgeden erek erte bastalady. Jazdyń aptaby men qystyń qaharly aıazynda, kóktemniń ókpek jeli men kúzdiń qara sýyǵynda qajymaıtyndar tańǵy 3-te tańmen talasa oıanady. Mekemeniń tasymaldaýshy kóligimen jumysqa jetkizilip, 5: 40-ta bólingen ýchaskelerin qoqystan aryltýǵa attanady.
Jol jumysshysy jetkizgen tilek, sheshimin kútedi
«Eńbek erleriniń» jumys barysymen tanysýǵa barǵanda qalyptasqan tártip 1 sekýndqa keshikpeıtinin kórip tańdandyq. Jumysshylardy aımaqtarǵa bólip, mindetterin jiktep, úılestirýshi Gúlnara Nurmyshevanyń aıtýynsha, «Saryarqa» aýdanynda 90 maman úsh aýysymda qoqys jınap, kóshelerdi jýyp-shaıady, shań – tozańnan tazartady. Bul topqa jaz maýsymynda qala turǵyndary men qonaqtary jıi serýendeıtin, sodan bolar qoqys kólemi ádettegiden kóp jınalatyn Esil jaǵalaýynyń mańyn aınadaı etý mindeti tıesili. Soǵan qaramastan kóldeneń qoqys jatpaǵan ýchaskeniń tazalyǵyn úzdiksiz saqtaý syryn Gúlnara Qydyrbaıqyzy baıandap berdi.
«Esil jaǵalaýy - mereke nemese jaı ǵana jazdyń jaıly keshinde adamdar eń kóp jıylatyn oryn bolǵandyqtan saýda qatarlary men kóńil sergitetin aımaq kóp. Osy sebepterdi eskersek, bul oryn eń qatty shashylyp jatatyn aýmaq bolý kerek. Dese de bizdiń qyzmetkerler mundaıǵa jol bermeıdi. О́ıtkeni biz aýmaqty ashyq qaldyrmaımyz. Tańǵy 6-dan 16: 00-ge deıin osy top tazalyqty saqtaıdy, qoqys jáshikterine deıin bosatady. Bizden keıin ekinshi aýysym túngi 12-ge deıin jaǵalaýdyń jarqyrap turýyna úles qosady», degen Gúlnara Qydyrbaıqyzy turmystyq qaldyqtarmen, antısanıtarııalyq jaǵdaıatpen kúnbe-kún betpe-bet keletin jol jumysshylarynyń qyzmetin densaýlyqqa jáne ómirge zııany bar jumys qataryna qosý usynysyn ortaǵa saldy.
«Uıqy rejımi buzylýynyń tán saýlyǵyna áserin aıtpaǵannyń ózinde qoqysty qolmen ustaımyz. Al qoqys jáshikterinde qandaı zııan, jaǵymsyz zattardyń jınalatynyn táptishtep aıtyp jatýdyń ózi artyq. Kún saıyn qoqys aınalasynda tynystaıtynymyzdy qaperge alsaq, bul óz kezeginde densaýlyǵymyzdyń syr berýine soqtyrady. Túıindi taqyrypty kóterip-aq kelemiz áli de oń sheshimin tabatyna tilektestik, senim bildiremiz», dedi ol.
Másele mánine úńilsek, ún qosatyn úderis. Asylynda qalany tazartý mıssııasy turǵyndardyń densaýlyǵyn saqtaýmen úndesip jatyr. Al osy maqsatty júzege asyryp júrgenderdiń saýlyǵyna qamqorlyq tanytý Prezıdent jarııalaǵan «Jumysshy mamandyqtar jyly» aıasynda sheshimin kútedi.
Qala tazalyǵy – sana tazalyǵy
Tazalyq saqshylary jazda kóshelerdi, jaıaý júrginshiler jolyn jýyp-tazalap, qoqystardy jıyp, shyǵarýmen, aıaldamalardy tazartýmen aınalyssa, qysqy sharýalar da qaýyrt ári qyzý eńseriledi. «Astana Tazalyq» JShS bul mezgilde qar tazalap, ony qala syrtyna shyǵaryp, kók taıǵaqqa qarsy reagent sebedi. Túıindeı tarqatsaq turǵyndardyń jaıly tirshiligine jaǵdaı jasaıdy. О́miriniń 6 qys – kókteminde osyndaı mindetterdi múltiksiz oryndap júrgenderdiń biri jol jumysshysy – Nadyrbek Baqytnur. Qoǵamǵa paıdaly isten tirshiligin túletip otyrǵan keıipkerimiz turǵyndardyń ekologııalyq tazalyq tártibin buzbaýy jumystaryn edáýir jeńildetetinin tilge tıek etti.
«Bes saýsaq birdeı emes. Keı adamdar qaldyq, qoqysty arnaıy oryndarǵa tastasa, keıbiri kez kelgen jerde qaldyrady. Bizdiń mindetimiz osyndaı olqylyqtardy túzetý. Jubaıym ekeýmiz birdeı osy mekeme qyzmetkerimiz. Tasymaldaý, mezgil saıyn arnaıy kıim, qural-jabdyq ýaqytyly berilip turady. Merekelik syılyqaqylar da jumys isteýge shabyttandyrady», degen jol jumysshysynyń negizgi mamandyǵy – dánekerleýshi. Al Astana tazalyǵyna qosyp júrgen úlesi júrek qalaýy.
Qala kóshelerine kóz júgirtsek qoqys jáshikteri men konteınerler jetkilikti. Tek keı aýmaqtarda qoqys konteınerlerin jańalaý, suryptap tastaýǵa qolaıly jáshikterdi kóbeıtý kóńil aýdararlyq másele. «Astana Tazalyq» JShS osy mazmundaǵy turǵyndardyń talap-tilegine qulaq asýdy, ony sheshýdi oń jolǵa qoıǵan.
«Astanalyqtar qoqys jınaý, shyǵarýǵa qatysty usynys-shaǵymyn 109 iKomek qalalyq qyzmeti nemese resmı saıt arqyly joldaı alady. Mekeme shaǵymdy sheshimsiz qaldyrmaýǵa den qoıady. Budan bólek qoqystardy bekitilgen keste boıynsha tańerteń, keshke arnaıy polıgondarǵa aparyp tastaımyz», dedi «Astana Tazalyq» JShS О́ndiristik-tehnıkalyq bólimniń bas mamany Ánýar Magalov.
Jumys kedergisiz dóńgeleý úshin mekeme quzyrynda 440-tan astam arnaıy tehnıka bar. Tehnıka túgel zamanaýı GPS-navıgasııamen jabdyqtalǵan.
Adamnyń adal eńbegi, jumysshylardyń tehnıka tilin jetik meńgerýiniń arqasynda Astananyń tynysy ashylyp, shyraıy artyp tur. Memleketimizdiń aınasy - bas qalanyń muntazdaı tazalaǵyn sheteldikter de ańǵarǵan. Astana tórin aralaı júrip Portýgalııa, Ispanııa, Cheh respýblıkasynan kelgen qurbylarǵa kezigip, Astana tazalaǵyn baǵalaýdy suradyq.
«Astanaǵa kelgenimizge aldymyzǵa 4, keıingilerimizge bir kún boldy. Astana qalasy unap jatyr. Tazalyǵy - tamasha», dep bas barmaqpen baǵalady top týrıst. Kelesi osy saýalymyzǵa Belgııadan kelgen jup jaýap berdi. «Astanadaǵy alǵashqy kúnimiz. Aınalamyz taza. Kóńilimizden shyǵyp jatyr. Dese de qalany túgel kórip úlgermegendikten 5 balldyq júıeden 4 ball beremiz», dedi olar. Al Germanııalyq týrısttiń Astanada túnegenine eki kún bolǵan. Buǵan deıin Qaraǵandyǵa da taban tirep kelgen ol kúrejol boıyndaǵy tazalyqty aıryqsha atap ótti. «Birinshi Qaraǵandy qalasyna 5 kún saparlap keldim. Qaraǵandy-Astana arasy jaqyn bolǵandyqtan munda jeńil kólikpen jettim. Jol boıy taza, qoqystar kózime túspedi. Bul meni qýantty. Al Astana ádemi ári taza qala eken», dep oı bólisti sheteldik azamat.
Jergilikti astanalyqtardyń da pikiri osy mazmunǵa saıady. Bizge pikir bildirgen basym jurt qala tazalyǵyna jaǵymdy baǵa qoısa, bir turǵyn qala mańyndaǵy aýyl-aımaqtyń da tazalyǵyn baqylaýda ustaýdy usyndy.
О́zimiz ómir súrip otyrǵan qalanyń tazalyǵy «Astana Tazalyq» JShS jumysshylarynyń ǵana emes ár turǵynnyń qadamyna qaraılaıdy. Tazalyq tabaldyryqtan bastalatynyn qaperge alsaq, qala tazalyǵy - sana tazalyǵymen astasýy tıis.
Posmotret etý pýblıkasııý v Instagram
