Bıylǵy jazǵy demalysta Otyrar aýdanynyń bilim bólimine qarasty balalardyń jazǵy saýyqtyrý demalys lagerine 31 jalpy bilim beretin mektepten 1 050 balany jiberý josparlanyp otyr. Ár aýysymda 150 baladan demalyp, lager 7 aýysym boıynsha jumys isteıdi. Al «Mashat-Arasan» lagerinde bıyl Sozaq aýdanynan 450 bala tynyǵady. Demalys aımaqtarynda qaýipsizdik sharalary kúsheıtilgen, ıaǵnı beınebaqylaý kameralary ornatylyp, kásibı kúzet qyzmeti jumys isteıdi. Jaýapty mamandar lagerge kelgen árbir oqýshyny adamgershilikke, uıymshyldyqqa tárbıelep, qaýipsizdik erejelerin úırete otyryp, salamatty ómir saltyn qalyptastyrý, rýhanı jáne mádenı bilimderin jetildirý, salt-dástúrin damytý, otansúıgishtik, patrıottyq sezimderin arttyrýǵa baýlıtynyn aıtady. Ol úshin lagerde tárbıeshi, psıholog, medbıke jáne pán muǵalimderi jumys atqarady. Lagerdiń tárbıelenýshilerine emdeý-profılaktıkalyq, saýyqtyrý is-sharalaryn júrgizý maqsatynda as máziri men daıyndaý sapasy qatań tekseriletin bolady. Oqýshylar 5 mezgil tamaqpen qamtamasyz etiledi. Jalpy, oqýshylardyń jazǵy demalysyn tıimdi ári maǵynaly ótkizýine barlyq jaǵdaı jasalǵan.
Al Maqtaaral aýdanynda «Balalar men jasóspirimder shyǵarmashylyq ortalyǵy» janyndaǵy jazǵy saýyqtyrý lageri kúrdeli jóndeýden ótip, paıdalanýǵa berildi. Ǵımarattyń shatyry, edeni, terezeleri men esikteri tolyq aýystyrylyp, qazirgi zaman talabyna saı jańǵyrtylǵan. Ashanasy syrlanyp, sanıtarlyq-gıgıenalyq talapqa sáıkestendirildi. Balalardyń jaılylyǵy úshin jańa jýyný bólmeleri ornatyldy. Jazǵy maýsymda bul lager 8 aýysym boıynsha 1 500-ge jýyq balany qabyldap, árqaısysyna 10 kúndik demalys uıymdastyrady. Lagerde balalar úshin mádenı-sporttyq sharalar, shyǵarmashylyq úıirmeler, ıntellektýaldyq oıyndar, ekologııalyq jáne tárbıe saǵattary ótkizý josparlanǵan.
Túrkistan oblysy
