Jeńisti joldy Danııal Sábıt (50 kg) bastap, mońǵol Aldarhıshıg Batýlgadan basym tústi. Kóp keshikpeı rıngke Abylaıhan Júsipov kóterildi. Álem chempıonatynyń úsh dúrkin qola júldegeri tym kúshti qarsylasqa tap boldy. О́zbekstannyń úkilegen úmiti Asadhýdja Mýıdınhýdjaev 2023 jyly Tashkentte álem chempıony, byltyr Parıjde Olımpııa oıyndarynyń jeńimpazy atandy. Eki sańlaq birden ashyq aıqasqa bardy. Ekinshi raýndta Abylaıhannyń qabaǵy jaryldy. Dárigerler jerlesimizge jekpe-jekti jalǵastyrýǵa ruqsat bermedi. Erejege saı dál sol sátke deıin kimniń upaıy kóp bolsa, jeńis sonyń enshisine jazylady. Bul rette A.Júsipovtiń joly boldy.
Erasyl Jaqpekov (80 kg) pen Dáýlet Tólemisov (80 kg) Ýkraınanyń ókilderimen qolǵap túıistirdi. Bul básekelerde bizdiń jigitterdiń basymdyǵy anyq baıqaldy. Erasyl Artýr Kasıanovty ońaı eńserse, Dáýlet Mıkola Laktıonovqa adym ashtyrmady. Alyptardyń aıqasy Nurlan Saparbaıdyń (+90 kg) jarqyn jeńisimen aıaqtaldy. Kezdesý barysynda germanııalyq Denıs Ohony eki ret nokdaýnǵa jibergen jampozymyz bas júldeni qanjyǵasyna baılady. Ertýǵan Zeınýllınov (65 kg), Sabyrjan Aqqalyqov (75 kg), Saǵyndyq Toǵambaı (90 kg) qola medaldy enshiledi.
Sóıtip, qyzǵaldaqtar elinde jalaýy jelbiregen jarysta 5 altyn, 3 qola medal oljalaǵan elimizdiń ulttyq quramasy jalpy komandalyq esepte jeke-dara kósh bastady.
