Eńbek • 11 Maýsym, 2025

Elimizde orta bilikti mamandarǵa suranys joǵary

20 ret
kórsetildi
4 mın
oqý úshin

Bıylǵy jyldyń mamyr aıynda elimizdiń elektrondyq eńbek bırjasy – Enbek.kz portaly jumys izdeýshiler men jumys berýshiler arasyndaǵy aralyq kópir retindegi qyzmetin belsendi túrde jalǵastyrdy. Alaıda ótken aımen salystyrǵanda naryqtyń tynysy sál báseń tartqandaı, dep jazady Egemen.kz.

Elimizde orta bilikti mamandarǵa suranys joǵary

2025 jyldyń mamyr aıynda elimizdiń elektrondyq eńbek bırjasy — Enbek.kz portaly jumys izdeýshiler men jumys berýshiler arasyndaǵy aralyq kópir retindegi qyzmetin belsendi túrde jalǵastyrdy. 

Atalǵan aıda Enbek.kz júıesinde 86 myń bos jumys orny men 110 myń túıindeme ornalastyrylǵan. Bul – sáýir aıymen salystyrǵanda bos oryndar sany 11,8%-ǵa, al túıindeme 4,3%-ǵa azaıǵanyn bildiredi. 

Ádettegideı, eńbek naryǵynda eń kóp kadr suranysy bilim berý salasyna tıesili boldy – munda 15 myńnan astam bos oryn tirkelgen. Budan keıin qyzmet kórsetý salasynyń basqa túrleri (10,7 myń), sondaı-aq qurylys salasy (8,5 myń) suranys jaǵynan kósh bastap tur. Jumys oryndary negizinen iri qalalar men agroónerkásiptik aımaqtarda shoǵyrlanǵan.

Mamyr aıynda ortasha bilikti mamandar qataryna degen suranys usynystan 16%-ǵa asyp túsken. Bul – kásiptik bilim alǵan mamandardyń qazirgi naryqta baǵasynyń artyp kele jatqanyn kórsetedi. Al joǵary bilikti laýazymdarǵa kerisinshe, úmitkerler sany kóp, biraq naqty usynys az – bul óz kezeginde básekeniń kúsheıip otyrǵanyn ańǵartady.

Jumys berýshilerdiń belsendiliginen Astana qalasy birinshi orynǵa shyqty. Jalpy bos oryndardyń 11,5%-y osy óńirge tıesili. Odan keıin Túrkistan (7,5%) men Pavlodar (7,1%) oblystary ornalasqan. Alaıda birqatar óńirlerde jumys oryndarynyń sany kúrt qysqarǵan. Máselen, Batys Qazaqstan oblysynda – 36%, Almaty qalasynda – 35%, Mańǵystaýda – 34%, al Ulytaý oblysynda – 25%-ǵa tómendegen.

Jumys izdeýshiler arasynda 34 jasqa deıingi jastar eń belsendi sanat retinde tirkelip otyr – jalpy túıindemelerdiń 44%-yn quraıdy. Bul shamamen 48,6 myń úmitker degen sóz. Odan keıingi orynda orta jastaǵylar (37%). Jynystyq ara salmaqqa kelsek, áıelderdiń úlesi – 52,8%, erler – 47,2%.

Jumys izdeýshiler belsendiliginiń eń eleýli tómendeýi Almaty qalasynda tirkeldi — 28%-ǵa kemigen. Al basqa óńirlerde bul kórsetkish 15%-dan aspaǵan.

Mamyr aıynda da tártip saqshylaryna (1,8 myń bos oryn), medbıkelerge (1,7 myń) jáne júrgizýshilerge (1,5 myń) degen turaqty suranys saqtaldy.

Jalaqy boıynsha eń joǵary usynystar:

  • Taý-ken ónerkásibindegi basshynyń orynbasary – ortasha 788 myń teńge,

  • Bas qurylysshy – 662 myń teńge,

  • Burǵylaýshy-ınjener – 605 myń teńge.

Al jumys izdeýshiler arasynda jalaqyǵa qatysty eń joǵary kútimder:

  • Ushqyshtar – orta eseppen 2,3 mln teńge,

  • IT jobalar jetekshileri – 1,2 mln teńge,

  • О́ndiris ýchaskesi basshylary – 1,1 mln teńge.

Mamyr aıynyń eńbek naryǵyndaǵy kórinisi – suranys pen usynystyń araqatynasynda tabıǵı teńgerim bar ekenin, alaıda keı salalarda kadr tapshylyǵynyń seziletinin kórsetedi. Jastardyń belsendiligi men orta bilikti mamandarǵa degen suranys – qazirgi eńbek naryǵynyń basty ereksheligi. Al jalaqyǵa qatysty úmit pen naqty usynys arasyndaǵy alshaqtyq kásibı tájirıbe, biliktilik jáne eńbek ótiline tikeleı baılanysty ekeni anyq. Eńbek naryǵyndaǵy mundaı dınamıkany qadaǵalaý – eldegi adamı kapıtal sapasy men ekonomıkanyń naqty sektorlaryndaǵy ózgeristerdi túsinýge múmkindik beredi.