Densaýlyq saqtaý mınıstri Aqmaral Álnazarova quttyqtaý sózinde jalpy praktıka dárigerleri – medısınalyq júıeniń halyqqa eń jaqyn, ári mańyzdy býyny ekenin atap ótti.
«Búginde elimizde 6 myńǵa jýyq medısınalyq-sanıtarııalyq alǵashqy kómek (MSAK) sýbektisi azamattarǵa qyzmet kórsetip otyr. Ambýlatorııalyq uıymdarda tirkelgen ýchaskelerdiń 80 paıyzdan astamy jalpy praktıka dárigerlerine bekitilgen. Aldaǵy ýaqytta bul kórsetkishti 100 paıyzǵa jetkizý kózdelýde. Bul otbasylyq qyzmet kórsetý qaǵıdatyn tolyq iske asyrýǵa jol ashady», dedi vedomstvo basshysy.
Jıynǵa qatysqan Parlament Májilisiniń depýtaty Gúldara Nurymova da MSAK salasynyń strategııalyq mańyzyn erekshe atap ótti. Onyń aıtýynsha, alǵashqy medısınalyq kómekti damytý – tek elimiz úshin ǵana emes, jahandyq deńgeıdegi densaýlyq saqtaý saıasatynyń basym baǵyty.
«Jalpy praktıka dárigerleri – densaýlyq saqtaý qyzmetterin halyqqa barynsha qoljetimdi etetin basty baǵyttaýshylar. Olar tek naýqasty emdeýmen shektelmeıdi, qoǵamnyń densaýlyq mádenıetin qalyptastyrýǵa da ólsheýsiz úles qosyp otyr», dedi ol.
Konferensııa barysynda otandyq jáne sheteldik sarapshylar halyqpen jumys jasaýda ınnovasııalyq tásilderdi engizý, dárigerlik qyzmettiń sapasyn arttyrý, aqparattyq júıelerdi tıimdi paıdalaný, dári-dármekpen qamtý jáne kadrlyq áleýetti kótermeleý sekildi máseleler tóńireginde oı bólisti.
Atap aıtqanda, MSAK tıimdiligin arttyrý, jalpy praktıka dárigerleriniń qyzmetin jetildirý, densaýlyq saqtaý júıesin qarjylandyrý, zamanaýı tehnologııalardy engizý, dáriger eńbegin yntalandyrý men qoljetimdi dári-dármekpen qamtamasyz etý baǵyttary keńinen sóz boldy.
Is-shara aıasynda elimizdiń ár óńirinen kelgen úzdik 48 jalpy praktıka dárigeri kásibı jetistigi men halyqqa sińirgen eńbegi úshin arnaıy marapatqa ıe boldy. Olardyń qatarynda «Eńbek ardageri», «Densaýlyq saqtaý isiniń úzdigi», «Densaýlyq saqtaý isine qosqan úlesi úshin» tósbelgilerimen marapattalǵan dárigerler bar.
Konferensııa oflaın jáne onlaın formatta uıymdastyrylyp, 400-den astam medısına qyzmetkerlerin qamtydy. Qatysýshylar qatarynda Parlament depýtattary, Dúnıejúzilik densaýlyq saqtaý uıymynyń sarapshylary, medısınalyq mekemeler men kásibı birlestikterdiń ókilderi boldy.
Bul basqosý jalpy praktıka dárigeriniń kásibı mártebesin kóterip, MSAK salasyndaǵy reformalardy odan ári tereńdetýge jańa serpin berdi.
