Vedomstvonyń resmı ókili Shyńǵys Alekeshevtiń aıtýynsha, sońǵy ýaqytta keıbir azamattar tarapynan mas kúıinde kólik júrgizgeni úshin belgilengen jazany joıý nemese jeńildetý týraly talaptar túsip jatyr. Mınıstrlik bul talaptardy orynsyz dep sanaıdy jáne qoldanystaǵy tártipti ózgertýdi quptamaıdy.
«Ákimshilik quqyqbuzýshylyq týraly kodekstiń 608-babynda kózdelgen jaza 2020 jyly bekitildi. Bul sheshim jol qaýipsizdigin qamtamasyz etý maqsatynda qabyldanǵan. Atalǵan normalar – qoǵam qaýipsizdigin qorǵaýǵa baǵyttalǵan sharalar», dedi departament bastyǵy.
Mınıstrliktiń málimetinshe, sońǵy bes jylda elimizde mas júrgizýshilerdiń qatysýymen 2 500-den astam jol-kólik oqıǵasy tirkelgen. 460-tan astam adam qaza taýyp, 3 300-den astam azamat ártúrli dárejedegi jaraqat alǵan. Mundaı faktilerdiń biri Almaty qalasynda oryn alǵan. Mas kúıdegi júrgizýshi jol jóndeý jumysyna tartylǵan úsh jumysshyny qaǵyp ketip, sonyń ekeýi oqıǵa ornynda kóz jumǵan.
IIM ókili mas kúıinde kólik basqarý tek ákimshilik quqyqbuzýshylyq emes, ol adam ómirine qaýip tóndiretin áreket ekenin atap ótti. Sondyqtan mundaı quqyqbuzýshylyqtarǵa qatysty qoldanylatyn jazalar qoǵamdyq qaýipsizdik turǵysynan mańyzdy.
Mınıstrliktiń dereginshe, avtokólik sany artqanyna qaramastan, mas kúıinde ustalǵan júrgizýshiler sany azaıý úrdisinde. Bul qabyldanǵan sharalardyń tıimdiligin kórsetedi. IIM ókili mundaı shekteýler men jazalar quqyqbuzýshylyqtyń aldyn alýǵa baǵyttalǵanyn atap ótti.
Basqa elderdiń tájirıbesine sáıkes, keıbir memleketterde mundaı áreketter úshin jaza budan da qatań – mysaly, júrgizýshi kýáligin ómir boıyna alyp qoıý nemese kólikti tárkileý qarastyrylǵan.
Osyǵan oraı, Ishki ister mınıstrligi ákimshilik jaýapkershilikti jeńildetý týraly usynystardy qarastyrý orynsyz dep esepteıdi jáne zań talaptarynyń saqtalýyn qamtamasyz etýdi jalǵastyra bermek.
