Foto: Úkimettiń baspasóz qyzmeti
«Slovakııa – Qazaqstannyń Eýropalyq Odaqtaǵy senimdi seriktesi. Qazaqstan Prezıdenti Qasym-Jomart Toqaev Slovakııa Respýblıkasymen jan-jaqty strategııalyq áriptestikti damytýǵa erekshe mán beredi. Bizdiń elderimizde ónerkásipti, aýyl sharýashylyǵyn, joǵary bilikti adamı kapıtaldy damytý, sondaı-aq qolaıly geografııalyq jaǵdaı salalarynda kóptegen uqsastyqtar bar. Munyń bári Qazaqstan – Slovakııa qatynastaryn odan ári nyǵaıtýǵa berik negiz bolady», dedi Oljas Bektenov.
Aıta keteıik, ótken jyly eki el arasyndaǵy taýar aınalymy $140 mln-dy quraǵan. Al bıylǵy jyldyń 4 aıynda ózara saýda kólemi 46%-ǵa artqan. Sonymen qatar saýda qurylymyn ártaraptandyrý jáne taýarlar men kórsetiletin qyzmetter túrin odan ári keńeıtý sharalarynyń mańyzdylyǵy atap ótildi.
«Eki memlekettiń basshylary men premer-mınıstrler kezdesýleri – jobalardy júzege asyrýdyń jumyldyrýshy quramdas bóligi. Biz taýar aınalymyn arttyrýǵa ǵana emes, birlesken óndiris oryndaryn qurýǵa da múddelimiz», dep atap ótti Robert Fıso.
О́z kezeginde Qazaqstan organıkalyq óndiris salasynda birlesken kásiporyndar qurý jáne tájirıbe almasý, halyqaralyq naryqtarǵa turaqty shyǵýdy qamtamasyz etetin tıimdi kólik-logıstıkalyq baǵyttardy damytý arqyly aýyl sharýashylyǵy salasyndaǵy yntymaqtastyqty tereńdetýge múddeli.
QR Úkimetine otandyq tasymaldaýshylar tarapynan kelip túsken ótinishterdi eskere otyryp, Oljas Bektenov tranzıttik júk tasymaldaýǵa ruqsat berý kvotasyn odan ári ulǵaıtý máselesin qaraýǵa bastamashy boldy.
Taraptar jan-jaqty ózara tıimdi yntymaqtastyqty nyǵaıtýǵa jáne Robert Fısonyń Qazaqstanǵa resmı sapary barysynda qol jetkizilgen ýaǵdalastyqtardy tolyq júzege asyrýǵa nıetti ekenin jetkizdi.
