О́ńirdegi barlyq mektepte kórkem ádebıetti nasıhattaýdy basty maqsat etken jobaǵa uzyn sany 90 komanda qatysýǵa nıet bildirse, olardyń ishinen iriktelip alynǵan birneshe mekteptiń komandasy grand-fınalǵa joldama aldy. Uıymdastyrýshylardyń aıtýynsha, qorytyndy oıynda top jarǵan ujym 2 mln teńge qarjylaı syılyqqa ıe bolmaq.
Zerdeli jastardyń basyn qosqan oıyn birneshe aýdanda uıymdastyryldy. Baýyrjan Momyshuly men Sherhan Murtaza týǵan Jýaly aýdanynda ótken zııatkerlik oıynda Sheraǵanyń «Beseýdiń haty», Baýyrjan Momyshulynyń «Alystan sálem joldaımyn», Ázilhan Nurshaıyqovtyń «Aqıqat pen ańyz», Kúlásh Ahmetovanyń «Baq» óleńder jınaǵyna qatysty suraqtar tańdalypty.
Alty kezeńnen turatyn oıynda jasóspirimder joǵaryda atalǵan kitaptardy barynsha yntyzarlyqpen oqyǵanyna kýá boldyq. Onnan astam komandanyń bir deńgeıde jaýap berýi, úzdikterdiń qosymsha kezeńde anyqtalýy sózimizge dálel bolsa kerek.
Zııatkerlik oıyn qorytyndysynda Álıhan Bókeıhan atyndaǵy №15 tirek mektep lıseıiniń ujymy jeńimpaz atanyp, grand-fınalǵa joldama aldy. Sondaı-aq 30 mekteptiń ishinen úzdik shyqqan komandaǵa 500 myń teńgeniń sertıfıkaty tabystaldy. Endi bul komanda kil úzdikter topqa túsetin jyldyń basty oıynynda baq synaıdy.
Tarazda ótken qalalyq oıyndy uıymdastyrýshylar Muhtar Áýezovtiń, Tahaýı Ahtanovtyń, Áldıhan Qaldybaevtyń shyǵarmalaryna arnady. Nátıjesinde, №15 mektep gımnazııasy men №23 orta mektep oqýshylary úzdik shyqty. Al shalǵaıdaǵy Moıynqum aýdanynda uıymdastyrylǵan irikteý kezeńinde Shyǵanaq orta mektebi jeńimpaz atansa, Shý aýdanynyń úzdigi bolyp Abaı orta mektebiniń komandasy tanyldy. Atalǵan komandalardyń barlyǵy grand-fınal oıynyna qatysyp, 2 mln teńgege talasady.
Jambyl oblysy
