Mýzeı basshysy Gúlbaný Sársekeıdiń aıtýynsha, kezinde Gúlnar Mirjaqypqyzy atalǵan mýzeıdiń ashylýyna kóp eńbek sińirgen Ǵazız Ámirhanulyna 106 Alash qaıratkeriniń fotosýretin, sonymen qatar ákesiniń kózi tirisinde tutynǵan kóptegen buıymdy bergen.
Gúlnar apaı tapsyrǵan jádigerler qatarynda 1914 jyly Qazan qalasynan ekinshi ret basylyp shyqqan «Baqytsyz Jamal» romanynyń túpnusqasy, Mirjaqyptyń «Ahmed Baıtýrsýnovıch Baıtýrsýnov» atty bıografııalyq ocherkiniń qoljazba nusqasy bar. Ocherk orys tilinde jazylǵan.
«Bizdiń mýzeıde kezinde Mirjaqyptyń úıinde turǵan birqatar jıhaz, turmystyq buıymdar saqtalǵan. Sonyń ishinde Ǵaınıjamal anamyzdyń tórkininen kelgen as ústeliniń jóni bólek. Alash qaıratkerleri osy ústeldiń basynda jıi bas qosyp, dám tatyp, keńes qurǵan. Sondaı-aq Mirjaqyptyń kitap qoıatyn týmbasy, jol sómkesi, balalarynyń shashyn alatyn máshińkesi, uly Álibektiń kúmispen shekeletken kise belbeýi, Ǵaınıjamal anamyzdyń sháınegi men kúmis qasyǵy, áshekeı buıymdaryn saqtaıtyn qobdıshasy, sol úıdiń qol jýǵyshy men súlgisi, Gúlnar Mirjaqypqyzynyń alty aılyǵynan qalǵan jórgegi, keıin paıdalanǵan jazý máshińkesi bar», deıdi Gúlbaný Sársekeı.
Almaǵaıyp zamannan aman jetken qundy jádigerler alpys jyl boıy Máskeý qalasynda saqtalypty. Mýzeı dırektorynyń sózinshe, Mirjaqyp 1928 jyldyń aıaǵynda Qyzylorda qalasynda qamaýǵa alynady. Ǵaınıjamal Dýlatova sol kezde úıindegi biraz dúnıeni tatar kórshisi arqyly Máskeýge jibergen. Sol kezde 12 jasta bolǵan Gúlnar apaı qara shańyraqtaǵy qasterli dúnıeler joǵalyp ketpes úshin alpys jyl boıy aı saıyn Máskeýge aqsha aýdaryp otyrǵan.
Qostanaı oblysy
