Qalalyq «Shyǵys jastary» qoǵamdyq qory uıymdastyrǵan festıvalge shahardyń iri ónerkásip oryndarynyń mamandary qatysyp, jastarǵa bos jumys oryndaryn usyndy. Sonymen birge olarǵa óndiristik tájirıbe men jumysqa ornalasý jaıynda aqparat berildi.
– Festıvalge 16 iri zaýyt qatysty. Negizi, 20 dep josparlaǵanbyz. «Kazpolgıraf», «Qazaq-Astyq Group» syndy Semeıdegi aýqymdy zaýyttardyń bári tartylǵan, – deıdi «Shyǵys jastary» qoǵamdyq qorynyń atqarýshy dırektory Álibı Ábdýraımov.
Abaı oblysynyń Eńbek mobıldiligi ortalyǵy da festıvalge belsene qatysyp, óńirdegi eńbek naryǵynyń ahýaly, suranysqa ıe mamandyqtar týraly taldaý júrgizip, 300-ge jýyq bos jumys ornyn usyndy. Sonymen qatar qala ákiminiń orynbasary Qýanysh Ábildaev shahardyń áleýmettik-ekonomıkalyq damýyna úles qosyp júrgen eńbekshi jastarǵa alǵyshattar tabystap, olardyń eńbegine laıyqty baǵa berdi. Bilikti qyzmetkerler arasynda qurylysshylar, kommýnaldyq kásiporyn mamandary, temirjolshylar, elektr sheberleri, seh jumysshylary da bar.
– Jastardyń eńbekke degen yqylasy, kásibı shyńdalýǵa umtylysy – qala damýynyń kepili. Búgingi festıval – jumysshy mamandyqtardyń qoǵamdaǵy bedelin arttyrýǵa baǵyttalǵan mańyzdy qadam, – dep sanaıdy Q.Ábildaev.
Eńbek festıvaline qatysqan tehnıkalyq kolledjdiń túlegi Abaıbek Imanov jármeńke barysynda óndiristik kásiporynmen aldyn ala kelisim jasap, tájirıbeden ótýge múmkindik aldy.
– Men elektrmehanık mamandyǵy boıynsha oqydym. Qazir avtomattandyrylǵan stanoktar men qurylǵylar kóp, solarmen jumys isteı alamyn. Búgingi jármeńkede bir kásiporyn ókilderimen sóılesip, aldaǵy aıda tájirıbeden ótýge kelisim jasastym. Qabilet-qarymymdy kórsete alsam, jumysqa qabyldaýǵa daıyn ekenin aıtty, – deıdi ol.
Mamandyqtar jármeńkesi konserttik baǵdarlamaǵa ulasty. Osylaısha, jumys izdeýshi jastar men bilim alýshylar jármeńkede túrli jumys ornymen tanysyp, jumys berýshilermen tikeleı áńgimelesti. Qysqasy,eńbek festıvali talaı jastyń qanat jaıýyna sep bolady degen senimdemiz.
Abaı oblysy
