Foto: Ǵylym jáne joǵary bilim mınıstrligi
Ajar Tursynovanyń aıtýynsha, qazirgi tańda ınsýlt – densaýlyq saqtaý salasyndaǵy ózekti jahandyq másele.
«Búgingi tańda mı ınsýlti álem boıynsha densaýlyq saqtaý salasyndaǵy jahandyq problema. Insýltti dıagnostıkalaýda túrli tásilder qoldanylady. Bul kóp ýaqytty qajet etetin aýyr jumys. Negizinen, mı ınsýltin anyqtaý jáne segmentasııalaý kompıýterlik tomografııaǵa (KT) jáne magnıtti-rezonanstyq tomografııaǵa (MRT) baılanysty. Rentgenologtar men nevropatologtar alynǵan keskinderge ózderi saraptama júrgizedi, biraq ınsýlt kórinisteri álsiz baıqalatyn sýretterdi zerttegende qatelikterge alyp kelýi yqtımal. Al bizdiń ádis, ıaǵnı jasandy ıntellektini paıdalaný jedel dıagnostıkalyq jumystardy júrgizýge kómektesedi. Medısınalyq sýretterdi jyldam taldaýǵa jáne túsindirýge múmkindik beredi, bul ınsýltti anyqtaý dıagnostıkasyn tezdetedi», deıdi QazUÝ ǵalymy Ajar Tursynova.
Jasandy ıntellekt negizindegi jańa júıe bul máseleni sheshýge baǵyttalǵan. Ol medısınalyq sýretterdi jyldam ári dál taldaýǵa múmkindik beredi. Sonyń nátıjesinde ınsýltti erte kezeńde anyqtaý jáne naqty sheshim qabyldaý úderisi aıtarlyqtaı jedeldeıdi.
Ǵalym bul jobasy úshin patent alyp, ǵylymı jýrnaldarda maqalalar jarııalaǵan. Aldaǵy ýaqytta zertteýshi ádistemeni ári qaraı jetildirip, naqty medısınalyq praktıkaǵa engizýdi kózdep otyr.
