- AQSh-tyń Sharlott qalasynda taekvondodan Gran-prı dodasynyń jalaýy jelbiredi. Bul básekede Temirlan Tileýles (58 kg), Bektóre Oralhanov (58 kg), Gazez Nurbek (68 kg), Batyrhan Tóleýǵalı (80 kg), Nodıra Ahmedova (49 kg), Rıta Bákisheva (49 kg), Nuraı Qusaıynova (67 kg) syndy daıan sheberleri el namysyn qorǵaıdy.
- Ekijaqty kelisimsharttyń merzimi aıaqtalýyna baılanysty Almatynyń «Qaırat» fýtzal klýbynyń bas bapkeri Marlon Velasko óz qyzmetinen ketti. 38 jastaǵy ıspanııalyq maman «Qaırattyń» tizginin 2023 jyly ustady. Onyń basshylyǵymen klýb el sýperkýbogin eki ret oljalady. Portýgalııada ótken «Masters Cup» týrnırinde top jaryp, ÝEFA chempıondar lıgasynyń kúmis júldegeri atandy. Komandanyń basshylyǵy Marlon Velaskoǵa alǵys aıtyp, aldaǵy kúnderi de eńbeginiń jemisti bolýyna tilektestik bildirdi.
- Kezinde Olımpııa oıyndarynda atoı salyp, biri – altyn, ekinshisi – eki ret qola alǵan qos boksshy – Danııar Eleýsinov (12-0, 7 KO) pen Ivan Dychko (14-0, 13 KO) kásipqoı rıngtegi kezekti kezdesýlerin 19 shildede AQSh-tyń Vashıngton qalasynda ótkizedi. Danııar sońǵy ret byltyr qyrkúıek aıynda Almatyda fılıppındik Djo Noınaıdy uryp jyqty. Al Ivannyń sharshy alańǵa shyqpaǵanyna bir jylǵa taıap qaldy. Sońǵy ret ol Plant-Sıtıde rıng qojaıyny Kreıg Lıýısti nokaýtqa jiberdi. Olardyń qarsylastary kimder ekeni taıaý kúnderi belgili bolady.
- Maýsym aıynyń sońynda Ulybrıtanııada shymyldyǵy túriletin «Ýımbldon» týrnıriniń júlde qory bıyl 54 mıllıon fýnt sterlıngti qurap otyr. Byltyrǵymen salystyrǵanda bul 7%-ǵa artqan. Jekelegen saıysta jeńimpaz atanǵan tennısshiler 3 mıllıonnan alsa, fınalda utylǵandar sol somanyń teń jartysyn enshileıdi. Tipten, tusaýkeser kezdesýinde súringen oıynshy da Tumandy Albıon saparynan qur qol qaıtpaıdy. Olardyń esepshotyna 66 000 aýdarylady.
- 23 tamyzda Qytaıdyń Shanhaıynda UFC týrnıri uıymdastyrylady. Sol jarysta Dıar Nurqojaı (10–1) kúsh synasady. Onyń qarsylasy – qyrǵyz Ýran Satybaldıev (9–1, UFS). Bul aralas jekpe-jek sheberleriniń ekeýi de álemdegi eń beldi promoýshende bıyldan bastap óner kórsetip, tusaýkeser kezdesýlerinde jeńilis tapty. Dıar brazılııalyq Brendson Rıbeırodan, Ýran slovakııalyq Martın Býraıdan utyldy.
