Aq halattylardyń aınymas serigine aınalyp, naýqastardyń dertine daýa darytýǵa atsalysyp júrgen densaýlyq saqshysynyń biri Záýresh Bekenqyzynyń qyzmetin aýdan turǵyndary joǵary baǵalaıdy. Shymkent medısınalyq ýchılıshesinde bilim alyp, eńbek jolyn aýrýhanada bastaǵan ol – búginde tájirıbesi mol, bilikti maman. 1993 jyldan beri, 35 jylǵa jýyq meıirbıkelik qyzmetin adal atqaryp kele jatqan jan Tólebı aýdandyq ortalyq aýrýhanasynda emdelýshilerdiń alǵysyna bólenip júr. Alǵashqy qyzmetin aýrýhananyń gınekologııa bóliminde bastaǵan Záýresh Bekenqyzy qazirde reabılıtasııa bólimshede eńbek etedi.
Aýrýhana basshysy Qarlyǵash Omarova meıirbıkeniń ár naýqasqa erekshe janashyrlyqpen qarap, kásibı turǵyda kómek kórsetip júrgen altyn júrekti jan ekenin aıtady.
«Qyzyǵy men qıyndyǵy mol mamandyǵym ózime unaıdy, talaı jaqsy adamdarmen áriptes bolyp birge jumys istedik. Bizdiń mamandyqta óz isińdi jaqsy kórýmen qatar, tózimdi bolýyń da kerek. Eńbek jolymda ártúrli qyzyq ta, qıyndyq ta kezdesti. Naýqas jannyń oıynan shyǵý ońaı emes, sondyqtan árbiriniń kóńilin tabýǵa tyrysamyz. Aýrýhanaǵa erekshe bir úmit artyp keletin jandardyń janaryndaǵy sol úmit otyn jandandyra túsýge, senimin nyǵaıtýǵa, jigerlendirýge tyrysamyz. Kópshilik arasynda aýrýhananyń aýrasy men moraldyq-psıhologııalyq ahýaly aýyr mekeme ekenin aıtýshylar da, jumystaryń qıyn dep janashyrlyq tanytyp jatatyndar da az emes. Mine, osyndaı túsinik qalyptaspas úshin de árbir emdelýshimen jyly, durys qarym-qatynas ornata bilý mańyzdy. Keıde jany qınalǵan naýqas kóńilge tıer sóz de aıtyp qalady. Mundaıda keshirimmen qarap, eshteńe aıtylmaǵandaı mindetimizdi atqara beremiz», deıdi Záýresh Bekenqyzy.
Iá, aýrýhana tirshiliginiń ózindik ereksheligi kóp. Keıipkerimiz – medısına qyzmetkeri ǵana emes, úlken áýlettiń uıytqysy bolyp otyrǵan ıbaly kelin, kópbalaly ana. Kúlli qazaqqa tanys, aýdan maqtanyshy – О́nerbaevtar áýleti qara shańyraǵynyń tútinin tútetip, medbıkelik qyzmetimen qatar, úıdegi abyz aqsaqal men altyn qursaq anaǵa qarap, kúıeýi Jeńis Áltaıulymen bes ul-qyz ósirip-tárbıelegen jan. Elimizdegi bedeldi oqý oryndarynda memlekettik grantpen oqyp, shetelde tájirıbeden ótken ul-qyzdary búginde elimizdiń aldyńǵy qatarly jumys oryndarynda tabysty eńbek etip júr. Jasy toqsanǵa taıaǵan enesine aıaýly kelin retinde erekshe kútim jasap otyrǵan Z.Bekenqyzy óz otbasy ǵana emes, aýyldastar men aýyl-aımaqtyń da alǵysyna bólengen jan. Meıirimdi meıirbıke otbasylyq sharýashylyqta da belsendi. Úıde mal ustap, baý-baqsha salyp, jyl saıyn qysqa kókónis pen jemis daıyndap, aýyl tirshiliginiń bar sharýasyn tııanaqty atqaryp keledi.
Túrkistan oblysy
