Qatysýshylar Kunjut Studio shyǵarmashylyq keńistiginde balshyqtan buıymdar jasap, ýaqytty birge ári paıdaly ótkizýge múmkindik aldy, dep habarlaıdy elorda ákimdiginiń resmı saıty.
Is-sharany Astana qalasynyń Jastar saıasaty máseleleri basqarmasy men «Damý» Qazaqstandyq qaýymdastyǵy birlesip uıymdastyrdy.
Sharanyń maqsaty — áke men bala arasyndaǵy emosıonaldyq baılanysty nyǵaıtý, belsendi otbasylyq demalysty nasıhattaý jáne birlesken shyǵarmashylyq arqyly sheberlik daǵdylaryn damytý.
— Ákeler kúnine oraı osyndaı is-sharany ákeler men balalardyń birge ýaqyt ótkizýi úshin uıymdastyrdyq. Bul — «Otbasy — baqyt mekeni» jobasy aıasynda júzege asyrylyp otyrǵan shara. О́tken jyly da osyndaı sheberlik saǵaty ótken, qatysýshylarǵa unaǵandyqtan, bıyl taǵy qaıtaladyq. Jobanyń maqsaty — otbasylyq qundylyqtardy dáripteý, ákeler men balalar arasyndaǵy baılanysty kúsheıtý, — dedi Jastar saıasaty máseleleri basqarmasynyń bas mamany Baljan Qolqanat.
Sharaǵa 20-dan astam otbasy qatysty.
Qatysýshylardyń biri Nurlybek Muratov qyzy Arýjanmen birge gúlge arnalǵan vaza jasaǵandaryn aıtyp, mundaı bastamalardyń mańyzyn atap ótti.
— Balalarmen birge ýaqyt ótkizý — úlken múmkindik. Qazir ata-analar jumysta kóp ýaqyt ótkizedi, al osyndaı sátter — balańmen birge bolyp, bir nárse jasaýǵa, áke men bala arasyndaǵy baılanysty nyǵaıtýǵa taptyrmas jol, — dedi ol.
