Elbasy memlekettik nagradalar tapsyrdy

Memleket basshysy Nursultan Nazarbaev marapattaý rásimine qatysýshylardy eń aldymen Otan qorǵaýshy kúnimen jáne Uly Otan soǵysyndaǵy Jeńistiń 70 jyldyǵymen quttyqtady.

Qazaqstan Prezıdenti marapatqa usynylǵandardyń bári de eren eńbegimen, qaltqysyz qyzmetimen erekshelengen jandar ekenin atap ótti. «Bıyl Uly Otan soǵysy men tyl ardagerlerine táýelsiz eldiń tól nagradalary tapsyrylady. Búgingi urpaq Uly Jeńisti alyp bergen aǵa býyn aldynda árqashan qaryzdar. Memleket basshysy retinde men búkil el atynan sizderge myń alǵys aıtamyn, ardaqty ardagerler», – dedi Elbasy.

 Memlekettik nagradalardy tapsyrý kezinde Nursultan Nazarbaev er-azamatqa týǵan Otandy, qasterli táýelsizdikti qorǵap, el tynyshtyǵyn kúzetýden asqan mártebe joq ekenin aıtty. «Sizder sol abyroıly boryshty adal atqardyńyzdar jáne atqaryp kelesizder. Sizder soǵystan keıin de elge qyzmet etýdi jalǵastyryp, beıbit kúnde de batyrlyqqa oryn bar ekenin qapysyz dáleldeı bildińizder. Qoǵamda turaqtylyq pen tártiptiń saqtalýy da myna sizderdiń eńbekterińizge tike­leı baılanys­ty», – dedi Qazaqstan Pre­zı­denti óz sózinde.

Eldiń ómirinde Otan qorǵaýshy erdiń orny qashanda erekshe. «Ulttyq ásker – egemen eldiń qurysh qalqany. Onyń basty mindeti – ult pen ulystyń qaýipsizdigin qamtamasyz etý. Búginde shekaramyzdyń qaýipsizdigi men hal­qymyzdyń amandyǵyn senimdi sarbazdar kúzetip tur. Olar ata-baba­lardyń erlik dástúrin laıyqty jalǵastyryp, aǵa býyn amanatyna adal bolady dep senemin. Elge qorǵan bolý úshin er-azamatqa qajymas qaırat, asqaq rýh qajet ekeni anyq. Sizderdiń boı­laryń­yzdan sonyń bári tabylady», dedi Nur­sultan Nazarbaev.

 Budan keıin Qazaqstan Prezıdenti memlekettik nagradalar tapsyrý rásimi eki birdeı mańyzdy merekeniń qarsańynda ótip otyrǵanyna nazar aýdardy. «Búgin oǵan eldiń bostandyǵy men beıbit ómirin qorǵap qalǵan ardagerler qatysyp otyr. Biz sizderge «Barys» jáne «Qurmet» ordenderin tapsyramyz. Bul – búgingi urpaq sizderge usyna alatyn syı-qurmettiń bir bólshegi ǵana. Búkil el, búkil álem fashızmnen qorǵap qalǵandaryńyz úshin sizderge boryshtar. Arda­gerlerdi marapattaý úzilmes urpaq sabaqtastyǵyn aıǵaqtaıdy. Sizder­diń maıdan dalasy men beıbit ómir­degi erlikterińiz árdaıym batyr­lyq pen otanshyldyqtyń úlgisi bolyp qala bermek. Uly Jeńiske qol jetkizgenderdiń barlyǵy úshin eń úzdik marapat – táýelsiz Qazaqstan, órkendeý jolyndaǵy elimiz, azamattarymyzdyń baqýatty ómiri. Bul sizderdiń erlik­terińizdiń beker ketpegenin dáleldeıdi. Búginde sizderdiń isterińizdi qazaq­stan­dyqtardyń jańa urpaǵy tabysty jalǵastyrýda. El olardyń da eńbe­gin baǵalaıdy», – dedi Nursultan Nazar­baev.

Qazaqstan Prezıdenti, sonymen qatar, bul joly ordender men medal­dar tapsyrylatyn jandardyń qa­tarynda túrli sala men uıymnyń ókil­deri bar ekenin atap ótti. «Bar­shańyzdy beıbit ári baqýatty Qazaqstandy damytýǵa qosqan zor úles biriktiredi. Qazir, beıbit ýaqytta sizder táýelsizdikti kúzetesizder, el shekarasyn, turaqtylyqty, tynyshtyq pen respýblıkamyzdaǵy zańdylyqtyń saqtalýyn qorǵaısyzdar. Sizderdiń ómirlerińiz tutastaı Otanǵa qyzmet etýge arnalǵan. Men sizderge bul nagradalardy rızashylyqpen tapsyramyn», – dedi Memleket basshysy.

Osydan keıin Nursultan Nazarbaev rásimge qatysýshylardy taǵy da quttyqtap, olarǵa zor densaýlyq pen tabys tiledi.

Marapattalǵan ardagerler Mem­leket basshysyna ózderine kór­setilgen zor qurmet pen qamqorlyǵy, sondaı-aq, elde tatýlyq pen tynysh­tyqty qamtamasyz etip otyrǵany úshin rızashylyqtaryn bildirdi.

Sonymen, III dárejeli «Barys» ordeni Almaty qalasynan kelgen soǵys ardageri S.Jıenbaevqa jáne Almaty oblysynan kelgen soǵys jáne eńbek ardageri S.Isaevqa tabystaldy.

Al «Qurmet» ordenimen soǵys ardageri M.Abdrahmanov (Oral qa­lasy), soǵys ardageri Z.Ádilbekov (Almaty qalasy), soǵys ardageri Q.Ámirenov (Pavlodar qalasy), soǵys ardageri Q.Bekenov (Astana qalasy), soǵys ardageri B.Boqaev (Mańǵystaý oblysy), soǵys ardageri V.Bolotın (Qaraǵandy oblysy), soǵys ardageri K.Brezgovın (Qostanaı oblysy), eńbek ardageri A.Daýylbaev (Soltústik Qazaqstan oblysy), soǵys ardageri M.Domoves (Shyǵys Qazaqstan oblysy), soǵys ardageri A.Elýbaev (Atyraý oblysy), soǵys ardageri O.Jalmaǵambet (Aqtóbe qalasy), soǵys ardageri Sh.Janybekov (Almaty qalasy), soǵys ardageri S.Jaryqbasov (Almaty oblysy), soǵys ardageri R.Jıtkovskaıa (Almaty qalasy), soǵys ardageri I.Qalıev (Qyzylorda qalasy), soǵys ardageri I.Qurbanov (Jambyl oblysy), soǵys ardageri M.Poltaraskaıa (Astana qalasy), soǵys ardageri J.Ramazanov (Kókshetaý qalasy), soǵys ardageri S.Shámenov (Ońtústik Qazaqstan oblysy) marapattaldy.

II dárejeli «Dańq» ordenine Qa­zaqstan Respýblıkasy Qarýly Kúshteri Bas shtaby bastyǵynyń birinshi orynbasary R.Álimov, Astana qalasynyń prokýrory S.Bekbosynov, Qostanaı oblysy ishki ister departamentiniń bastyǵy T.Mátkenov, Qazaqstan Res­pýblıkasy Memlekettik kúzet qyzmeti bastyǵynyń orynbasary Q.Oraz­qulov, Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttigi apparatynyń basshysy A.Shaıymova laıyq dep tanyldy.

Al II dárejeli «Aıbyn» or­deni­men Qazaqstan Respýblıkasy Bas pro­kýratýrasynyń departament bas­tyǵy R.Dosymbekova, Qazaqstan Respýblıkasy Ulttyq qaýipsizdik komıteti Shekara qyzmetiniń 1-avıa­sııalyq bazasynyń ushý daıyn­dyǵy komandıriniń orynbasary M.Kaýshenov, Qazaqstan Respýblıkasy Qorǵanys mınıstrligi №44803 áskerı bóliminiń komandıri N.Qabaqov, Qazaqstan Respýblıkasy Qarýly Kúshteri Qurlyq áskerleri Bas qolbasshysy basqarmasy bas shtaby bastyǵynyń orynbasary – jedel bas basqarmanyń bastyǵy A.Stepanenko marapattaldy.

 III dárejeli «Aıbyn» ordeni Qazaqstan Respýblıkasy Qarýly Kúshteri Áýe qorǵanysy kúshteriniń serjanty – Áýe qorǵanysy kúshteri bas qolbasshysy basqarmasynyń bólim bastyǵy S.Shorahanovqa tabystaldy.

«Erligi úshin» medalimen Qazaqstan Respýblıkasy Ulttyq qaýipsizdik komıteti Shekara qyzmeti Jaǵalaý kúzeti óńirlik basqarmasy «Saqshy» shekara kemesiniń komandıri E.Ka­lıshev, Qazaqstan Respýblıkasy Ishki ister mınıstrliginiń Qaraǵandy oblysy Ishki ister departamentiniń ıns­pektory E.Sadyqbekov, Qazaqstan Respýblıkasy Qorǵanys mınıstrligi №28079 áskerı bólimi arnaıy maqsattaǵy desanttyq-shabýyldaýshy rotasynyń aǵa radıotelefonshysy S.Sarmyrzaev, Qazaqstan Respýb­lıkasy Ishki ister mınıstrligi Tótenshe jaǵdaılar komıtetiniń Soltústik Qazaqstan oblysy Tótenshe jaǵdaılar departamentiniń aǵa ınjeneri S.Seı­fýllın marapattaldy.

«Jaýyngerlik erligi úshin» medali Qazaqstan Respýblıkasy Mem­le­kettik kúzet qyzmeti Obektilerdi qorǵaý qyzmeti №0112 áskerı bóli­mi qurmet qaraýyly rotasynyń komandıri A.Elamanovqa, Qazaq­stan Respýblıkasy Qorǵanys mınıs­tr­ligi №62064 áskerı bóliminiń ko­mandıri Sh.Jarylqasynovqa, Qazaqstan Respýblıkasy Ulttyq qaýip­sizdik komıteti «Arystan» qyzmeti bastyǵynyń orynbasary D.Jumabekovke, Qazaqstan Respýb­lıkasy Ulttyq ulany «Batys» óńirlik qolbasshylyǵynyń ofıseri S.Qab­dyqulovqa, Qazaqstan Respýblıkasy Qorǵanys mınıstrligi №29011 áskerı bólimi shtab bastyǵynyń orynbasary – shtab jedel bólimshesiniń bastyǵy D.Qaıroshevke berildi.

Láıla EDILQYZY, «Egemen Qazaqstan».