Jýyrda aýylda «Zań jáne Tártip» atty kezdesý ótip, eldi meken aýmaǵynda alkogol ónimderin satýdan erikti túrde bas tartý týraly bastama kóterildi. Bul usynysty alǵashqylardyń biri bolyp aýyl aqsaqaldary qoldady. Olar: «Qoǵamnyń berekesin ketiretin nárseniń beti aýlaq bolsyn. Araq ishken jerde tártip pen tııanaq bolmaıdy» degen baılamdaryn ortaǵa salyp, jastardyń bolashaǵy úshin bul sheshimniń mańyzyn atap ótti.
Kezdesý qorytyndysynda aýyl turǵyndary biraýyzdan ishimdikti satý men taratýdan bas tartý jónindegi hattamaǵa qol qoıdy. Osylaısha, Dalabaı aýyly ishimdiksiz aýyldardyń qataryn tolyqtyrdy.
Oblystyq prokýratýra bul bastamanyń quqyq buzýshylyqtyń aldyn alý men qoǵamdyq kelisimdi nyǵaıtýda úlgi bolarlyq tájirıbe ekenin atap ótti.
«Mundaı qadamdar elimizdiń ózge de óńirlerinde qolǵa alynyp jatyr. Keıbir aýyldarda sońǵy jyldary birde-bir qylmystyq is tirkelmegen. Bul halyqtyń ózi zań men tártipke tirek bola alatynyn kórsetedi», delingen prokýratýranyń resmı habarlamasynda.
Aıta ketý kerek, osyǵan deıin Almaty oblysy Balqash aýdanyna qarasty Boıaýly aýyly da osyndaı sheshim qabyldap, ishimdikten múlde bas tartqan. Qazir ol aýylda tártip buzý oqıǵalary men quqyqqa qaıshy áreketter joqtyń qasy.
