Alaıda keıbir jandardyń qıyn jaǵdaıy zańda jetkilikti qarastyrylmaǵan ba, álde zańnamany jetik bilmeıtin sheneýnikter eskermeı me, áıteýir áleýmetshil memleketimizdiń janashyrlyǵyn joqqa shyǵaryp, daǵdaryp qoıatyn oqıǵalar da kezdesip qalady. Biz búgin sonyń bir mysaly týraly áńgimelemekpiz.
Kámılá (qujatta Ámıná) Álibaeva soltústikke aty shyqqan ánshi, aqyndyq óneri de bar. Dástúrli ánniń dúldúli Ǵarıfolla Qurmanǵalıevtiń shákirti. Uzaq jyldar boıy halyqtyń rýhyn kóterýge atsalysyp, sahnada óner kórsetti. Petropavldyń fılarmonııasynda án shyrqady. Keńestik kezeńde qazaq ónerine qamqorlyq kemshin bolyp, fılarmonııadaǵy qazaq tobyn taratyp jibergen soń, oblystyq telearnada dybys rejısseri qyzmetin atqaryp, zeınet demalysyna shyqty. Telearnada istegen jyldary da ónerden qol úzbeı, oblys, respýblıka kólemindegi konsertterge, aıtystarǵa qatysyp, óńirimizdiń namysyn qorǵap júrdi.
Osyndaı jan búginde ǵarip bolyp otyr. Qant dıabeti dertiniń saldarynan birinshi toptaǵy múgedektikke ushyraǵan. Eki birdeı janary kórýden qalǵan. О́zeginen órgen eki ulynyń biri úılenip, bólek ketken. 30-dan asqan ekinshi uly júrip-turýy kisiniń qolyna qarap qalǵan anasyn kútip, janynda otyr. Resmı túrde «1-toptaǵy múgedek adamnyń kútýshisi» dep resimdelgen.
Sahnada jarqyldap júrgen jyldarda ónerin baǵalaǵan basshylar oǵan bir bólmeli páter bergizgen. Soǵan máz bolǵan basy qazaqtyń táýbeshildigimen ony keńitip alýdy balasy jas bolǵanda oılamaǵan eken. Oılasa da nan tabýdyń ózi qıyn bolǵan jyldarda oǵan qol jetkize almaǵan. Endi janyndaǵy balasy ósip, azamat bolǵanda ekeýine qýyqtaı bir bólme tarlyq etip otyr. Er azamattyń aldynda qartań kisige kıinip-sheshinýdiń ózi bir muń.
2008 jyly ol sol kezdegi oblys ákimi Serik Bilálovqa júginip, úıin keńitip berýdi ótingende, ákim onyń jaǵdaıyn komıssııamen qarap, 2009 jylǵy qyrkúıekte jeńildigi bar adamdar qatarynda keńeıtilgen úıdiń kezegine qoıǵyzady. Bul 4000-kezek bolatyn, biraq jazǵan qulda sharshaý bar ma, Kámılá apaı soǵan kónip, kezekke turǵan. Sodan beri 16 jyl ýaqyt ótse de Kámılá (Ámıná) Álibaeva áli kúnge laıyqty páter ala almaı keledi.
«Kezegimdi bilsem 244-ke jetken eken. Shúkir, azaıǵan eken dep qýanyp qalsam, qyzmetker maǵan: «Apa, meniń úıim bar, sondyqtan kezekten syzyńyz» dep aryz jazyńyz. Zań júzinde sizge úı berýge bolmaıdy», deıdi. Myna sózden keıin men júregim aýzyma tyǵylyp, talyp qala jazdadym. Sonda men 16 jyl boıy erikkennen kezekke turyp kelippin be, ondaı zań bolsa nege úı beremiz dep kezekke turǵyzdyńdar desem, álgi qyzmetshi mardymdy jaýap bermedi», deıdi ol.
Qaıtadan esikterdi jaǵalap, qabyldaýlarǵa jazylyp, kezekterge turyp, qashanǵy júre bersin, bul joly K.Álibaeva el gazeti «Egemen» ara túser me eken dep, bizge qaıryldy. «Turǵyn úı qatynastary týraly» Zańnyń 75-babynyń 1-bóliginde memleket beretin úılerdiń paıdaly kólemi árbir adamǵa 15 sharshy metrden kem bolmaıtyny, sondaı-aq zańda «otbasynda aýyr dertti adamdar bolsa ondaıǵa jeke bólme beriledi» dep jazylǵan. K.Álibaevanyń qazirgi úıiniń paıdaly kólemi 18 sharshy metr, 2 adamǵa eki esege jýyq tar.
K.Álibaeva: «Men artyq páter surap otyrǵan joqpyn, al degennen: «Bir bólmemdi alyp, ornyna kezegim kelgende eki bólmeli páter berseńizder boldy degenmin», deıdi.
Ádiletti, áleýmetshil eldiń qyzmetkerleri memlekettiń halyqqa jasap otyrǵan janashyrlyǵyna nuqsan keltirmeýge tıis. Tıisti organdar buǵan kóńil aýdarar degen úmittemiz.
Soltústik Qazaqstan oblysy
