Lázzat TURLAShOV, Parlament Senatynyń depýtaty:
– Elimiz táýelsizdigin alǵannan bergi ýaqytta kóptegen kásiporyndar ashylyp, jańadan 400-ge jýyq ónim túrleriniń shyǵarylýy, árıne, maqtanarlyq. Sonyń nátıjesinde jańadan 75 myń jumys oryndary qurylyp, bıýdjetimizge trıllıondaǵan teńge quıylýda. Árıne, munyń barlyǵy basy-qasynda Elbasynyń ózi júrip, naqty tapsyrmalar berýiniń arqasynda jasalǵan sharýalar. Sondyqtan da Prezıdentimizdi ulyqtaý rásimine degen halyqtyń yqylasy da erekshe dep bilemin. Ony biz keshe ǵana ótken saılaýdyń nátıjesinen anyq baıqadyq.
Saılaýǵa qazaqstandyqtardyń bir kisideı atsalysýy elimizdiń bolashaǵyna degen jaýapkershilik dep túsinemin. Sondaı-aq, bul saılaý halqymyzdyń aýyzbirshiligi men tatýlyǵyn da kórsetti. Árıne, barlyǵy da búgingi kúnmen sheshile salmaıdy. Alda áli sheshimin kútken talaı máseleler tur. Ásirese, «Nurly Jol» baǵdarlamasy men bes ınstıtýttyq reforma barlyǵymyzǵa úlken jaýapkershilik júkteıdi.
Ulasbek SÁDIBEKOV, Parlament Májilisiniń depýtaty:
– Men Prezıdentti ulyqtaý rásimine qatysqanyma qýanyshtymyn. Shynynda da, Elbasy Qazaqstannyń órkendeýi úshin kóp ter tókti dep bilemin. Sonyń jarqyn da basty dáleli retinde álemniń órkenıetti degen 50 eliniń qataryna kirip otyrmyz. Alda áli de asar asýymyz jeterlik. Bul rette «Nurly Jol» baǵdarlamasy men bes ınstıtýttyq reformany júzege asyrý úlken qajyr-qaıratty talap etedi.
О́z qyzmetine kirisken Prezıdent N.Á.Nazarbaevtyń aldaǵyny dál boljaı alatyn kóregen saıasatker ekenin eskersek, bul alǵa qoıǵan mindetterdiń oryndalaryna eshqandaı kúmán bolmasa kerek. Keshe ǵana ótken saılaýda Nursultan Nazarbaevqa halyqtyń 97,75 paıyzy óz daýystaryn bergeni – úlken senim artqandyqtyń belgisi dep bilemin. Endigi másele – aldaǵy bes jylda tabystarymyzdy eseleı túsý.
Murat AHMADIEV, Parlament Májilisiniń depýtaty:
– Qazaqstan halqy óz basshysyn saılap alýda úlken jaýapkershilik tanytyp, barlyǵy da saılaý ýchaskelerine baryp, óz tańdaýlaryn jasady. Artynan saılaýshylardyń 95 paıyzy daýys berýge barǵandyǵyn bilip otyrmyz. Muny men halqymyzdyń birligi men ujymdasa bilýimen baılanystyramyn. Kóregen basshysy bar eldiń bolashaǵy da jarqyn. Sondyqtan Elbasyn jeńisimen quttyqtaı otyryp, árdaıym Qazaqstan halqynyń baqyty úshin aıanbaı eńbek etýge daıynbyz degendi basa aıtpaqpyn.
Prezıdentti ulyqtaý rásimine qatysqan meniń boıymda maqtanysh sezim uıalasa, ekinshiden, aldaǵy aýyr mindetterdi sezine otyryp, úlken jaýapkershilikpen iske kirisýge daıyn ekenimdi de bildire ketkim keledi. Biz árqashanda Prezıdentpen birge boldyq jáne de birge kóptegen mindetterdi atqaramyz degen oıdamyn.
ASTANA.
