Foto: KTJ
«Jolaýshylar tasymaly» AQ jyljymaly quramdy jańartý baǵdarlamasy aıasynda birinshi, ekinshi jáne úshinshi klasstardan turatyn jańa elektr poıyzyn paıdalanýǵa berýdi josparlap otyr.
Bul quram Astana – Býrabaı baǵyty boıynsha qatynaıtyn bolady. Poıyz alty vagonnan turady jáne 374 jolaýshyǵa arnalǵan.
Qazirgi ýaqytta quram barlyq qajetti tehnıkalyq synaqtardan ótken. Qazir Keden odaǵynyń tehnıkalyq reglamenti talaptaryna sáıkes qujattardy rásimdeý aıaqtalyp jatyr.
Poıyzdy jobalaý barysynda qoljetimdilik pen ınklıýzıvtilikke erekshe nazar aýdarylǵan. Ár klassta bıoájethanalar ornatylǵan, sonyń ishinde múgedektigi bar jandarǵa beıimdelgen kabınalar qarastyrylǵan. Sondaı-aq múmkindigi shekteýli azamattarǵa arnalǵan platformalyq kótergishter ornatylǵan.
Avtomatty túrde ashylyp-jabylatyn basqyshtar jolaýshylardyń poıyzǵa jaıly minýin jáne túsýin qamtamasyz etedi, ásirese egde jastaǵy adamdar men balaly otbasylar úshin. Árbir oryn USB porttarymen jabdyqtalǵan, bul mobıldi qurylǵylardy qýattaýǵa múmkindik beredi. Sonymen qatar, poıyzda sýsyndar men jeńil taǵamdar satylatyn oryn qarastyrylǵan.
Buǵan deıin «Jolaýshylar tasymaly» AQ Comfort+ sanatyndaǵy alty vagondy elektr poıyzyn №6857/6858 Astana – Qaraǵandy baǵytyna iske qosqan bolatyn. Bul quram 576 jolaýshyǵa arnalǵan.
