Osy kelisimniń nátıjesinde talshyqty-optıkalyq baılanys jelisin salý jobasy jospardan bir jyl erte iske asady. Iаǵnı kelesi jyldyń sońyna deıin aıaqtalady. Al shalǵaı aýdandardaǵy baılanys 2027 jyldyń sońyna deıin jerseriktik baılanys arnalarymen qamtylady.
Osylaısha, atalǵan joba 2027 jyldyń sońyna qaraı elimizdegi aýyldardyń 99 paıyzyn jyldamdyǵy joǵary ınternetpen qamtamasyz etýge múmkindik beredi. Qysqasy, taıaý arada mektep, aýrýhana, ákimshilik ǵımarat, bıýdjettik uıymdar, sondaı-aq qoǵamdyq kirý núkteleri men memlekettik shekaralardaǵy 40-tan astam ótkizý beketi jelige qol jetkizbek. Aýyldyq eldi mekenderdi talshyqty-optıkalyq (88%) jáne jerseriktik arnalar (12%) arqyly jelige qosady.
Sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev óz sózinde joba aıasynda óńirlerdi damytýǵa teń jaǵdaı jasaıtyn sıfrlyq irgetas qalanǵanyn jetkizdi.
«Basty mindetimiz – aýyldardy ınternetke qosýmen qatar, eldi mekenderdi elimizdiń sıfrlyq ekojúıesine engizý. Bul – bilim alý, medısına, memlekettik qyzmetterge teń dárejede qoljetkizýdiń negizi. Infraqurylym turaqty jáne ashyq túrde jumys istegende, shaǵyn bıznes, aýyl mektepteri men jastarǵa arnalǵan jańa kásiptik baǵyttardy damytýǵa jol ashady», dedi ol.
Jobaǵa quıylǵan ınvestısııanyń jalpy kólemi 239 mlrd teńgeden asady. Bul – bıýdjetten tys qarajat. Ony «Qazaqtelekom» AQ iri telekommýnıkasııalyq ınfraqurylymyn paıdalanýdyń arqasynda júzege asyrǵan.
Al «Qazaqtelekom» AQ basqarma tóraǵasy Baǵdat Mýsın aýyl men qala balasynyń múmkindigi bilim alý, ózin-ózi damytý men zamanaýı tehnologııany paıdalanýda teń dárejede bolýǵa tıis ekenin aıtty.
«Biz sıfrlyq teńsizdikti joıýdy shalǵaıdaǵy aýyldardan bastadyq. Internetke qol jetkizý – qajettilik. Ony el Prezıdenti naqty aıtqan bolatyn», dedi B.Mýsın.
Sondaı-aq joba sheńberinde aýyldaǵy uıaly baılanys bazalyq stansalarynyń ınfraqurylymy kúsheıtiledi. Bul nysandarǵa deıin jetkizip talshyqty-optıkalyq jelini tóseý mobıldi ınternet pen baılanystyń sapasyn edáýir arttyrady.
Azat ESEN
