Elordadaǵy Eýrazııa ulttyq ýnıversıteti – elimizdegi mańdaıaldy oqý oryndarynyń biri. Buǵan deıin de biraz jetistikke qol jetkizgen ol osymen ekinshi jyl qatarynan halyqaralyq básekelestik ortada ósý qarqynyn kórsetip otyr.
Sondaı-aq atalǵan oqý orny «Jumys berýshiler arasyndaǵy bedel» jáne «POQ-stýdentter araqatynasy» kórsetkishteri boıynsha úzdik júzdikke endi. Bul ýnıversıtettiń sheteldik oqytýshylar men stýdentterge tartymdylyǵyn odan ári arttyra tústi.
QS aǵa vıse-prezıdenti Ben Saýterdiń aıtýynsha, álemdegi jetekshi joǵary oqý oryndarymen alshaqtyqty joıý úshin qazaqstandyq ýnıversıtetter qazirgi zamanǵy ǵylymı kún tártibine yqpalyn arttyrýǵa, halyqaralyq zertteý jobalaryna qatysýǵa jáne akademııalyq ortadaǵy bedelin odan ári nyǵaıtýǵa kúsh salýy qajet.
QS reıtıngi ýnıversıtetterdi 9 ólshemi boıynsha baǵalaıdy. Birinshisi, «akademııalyq bedel», ekinshisi, «bir oqytýshyǵa shaqqandaǵy dáıeksóz sany», úshinshisi, «jumys berýshiler arasyndaǵy bedel», tórtinshisi, «jumysqa qabilettilik», besinshisi, «oqytýshylar men stýdentterdiń araqatynasy», altynshysy, «halyqaralyq professor-oqytýshylar quramynyń úlesi», jetinshisi, «halyqaralyq ǵylymı yntymaqtastyq», segizinshisi, «halyqaralyq stýdentterdiń úlesi» jáne toǵyzynshysy «turaqtylyq».
Bıyl QS reıtıngine 106 memleketten 1501 joǵary oqý orny, onyń ishinde bizdiń elimizden 20 ýnıversıtet kiredi.
