Aqtóbede mektep bitirýshiler keshi ótti

AQTО́BE. 22 maýsym. Aqtóbe qalasyndaǵy Qazaqstannyń Tuńǵysh Prezıdenti Nursultan Nazarbaev atyndaǵy ortalyq mádenıet jáne demalys saıabaǵynda «Jas túlek-2015» atty mektep bitirýshilerdiń saltanatty keshi ótti. Bul týraly egemen.kz tilshisi habarlady. Saltanatty sharaǵa arnaıy qatysqan oblys ákimi Arhımed Muhambetov túlekterge quttyqtaý sóz arnady. «Elimizdiń erteńi – jastar. Táýelsiz elimizdiń bolashaǵy jarqyn, kók baıraǵynyń bıik bolýy sizderge baılanysty. Memleket basshysy Nursultan Nazarbaev árkez jastarǵa qoldaý kórsetip, úlken senim artyp keledi. Elbasy «Nurly jol – bolashaqqa bastar jol» atty Joldaýynda da «Nurly jol – bizdiń kreatıvti yrǵaqty jastarymyzdyń kúsh-jiger jumsap, qulash sermeıtin tusy» dep jastarǵa zor senim artty. Bıyl Qazaq handyǵyna 550, Uly Jeńiske 70, Ata Zańymyz ben Qazaqstan halqy assableıasyna 20 jyl tolǵan erekshe data. Sondyqtan sizder táýelsiz Qazaqstannyń, Máńgilik eldiń azamaty retinde aldaǵy ýaqytta Otanymyz úshin adal qyzmet etedi dep senemin», – dedi Arhımed Begejanuly. О́ńir basshysy oblysta bilim salasynda jasalyp jatqan ıgi ister men qol jetken jetistikter jaıynda áńgimeledi. Oqýshylarǵa sapaly bilim berý úshin az ǵana ýaqyt ishinde zaman talabyna saı 37 jańa mektep salynǵanyn, oqý jyly basynda 5 jańa mektep paıdalanýǵa berilse, qazir taǵy 13 bilim berý nysanynyń qurylysy júrip jatqanyn tilge tıek etti. Mektepterdiń materıaldyq-tehnıkalyq bazasy da nyǵaıyp kele jatqanyn, jańa modıfıkasııaly fızıka, hımııa, bıologııa bólmelerimen jabdyqtalyp, birqatar bilim berý uıymy «e-learning» elektrondy oqytý júıesine qosylǵanyn da nazarǵa aldy. Bilim sapasynyń basty baǵamy – ulttyq biryńǵaı testileý qorytyndysynda oblystyń ortasha kórsetkishi 82,68 balldy qurady. Oblys respýblıka boıynsha tórtinshi orynǵa taban tiredi. Bilim sapasy joǵary úsh aýdandy erekshe ataý oryndy. Olar: Hromtaý (95 ball), Alǵa (89 ball), Oıyl (86,8 ball) aýdandary. Aýyl mektepteriniń arasynda Hromtaý aýdanyndaǵy Bógetsaı gımnazııasy aldyńǵy qatarda tur: ortasha kórsetkish – 112,3 ball. Sonymen qatar, Muǵaljar, Shalqar, Yrǵyz, Áıteke bı aýdandarynyń da dınamıkasy joǵary. Oblys boıynsha 156 túlek – «Altyn belgi» ıegeri atanyp, 66 túlek úzdik attestat aldy. Sondaı-aq, 70 túlek halyqaralyq olımpıadalardyń jeńimpazy atandy. Budan soń oblys ákimi UBT-da eń joǵary – 124 ball jınaǵan úsh túlekke – Rahıla Týlına, Nazken Úmbetova, Aıdana Táńirbergenderge baǵaly syılyqtar tabys etti. Rahıla Týlına men Nazken Úmbetova «Altyn belgi» ıegerleri atandy. Odan bólek, Arhımed Muhambetov «Altyn belgi» ıegeri atanǵan túlektiń árqaısysyna attestat pen planshet berdi. Jıyn barysynda oblystyq qazaq-túrik lıseıiniń túlegi, «Altyn belgi» ıegeri Islam Muhammedrahym túlekter atynan oblys ákimine, ata-analar men ustazdarǵa alǵysyn bildirdi. Budan keıin «Altyn belgi» ıegerleri oblys ákimimen estelik sýretke tústi. Satybaldy Sáýirbaı. Derek, sýret: egemen.kz.