2025 jylǵy 21 maýsym kúni keshki saǵat 18:15 shamasynda bala Semeı qalasyndaǵy Týrıstıcheskaıa kóshesi, 92-úıden shyǵyp ketip, qaıta oralmaǵan. Habar-osharsyz ketkeni jóninde «102» jedel arnasyna túsken aqparattan keıin birden shuǵyl izdestirý jumystary bastaldy.
Balada damý ereksheligi (aýtızm) bar ekeni eskerilip, izdestirý jumystaryna erekshe nazar aýdaryldy. Abaı oblysynyń polısııa departamenti, Tótenshe jaǵdaılar departamenti, kınologııalyq qyzmet mamandary, Ulttyq ulannyń áskerı qyzmetshileri jáne arnaıy maqsattaǵy jasaq (JQAJ) ókilderi jumyldyryldy. Sonymen qatar, jylý beıneleý qurylǵysymen jabdyqtalǵan dron qoldanyldy.
22 maýsym kúni tańǵy saǵattarda izdeý jumystaryna 1000-nan astam adam tartyldy. Olardyń qatarynda eriktiler, qoǵamdyq birlestikter men qala turǵyndary boldy. Ashyq aýmaqtar tizbektele aralap, orman alqaptary, dala, aýla men kósheler muqııat tekserildi.
Túngi ýaqytta turǵyndar balanyń jylaǵan daýsyn estigeni jóninde eki ret habarlaǵan. Alaıda júrgizilgen shuǵyl tekserý barysynda bul aqparat rastalmady. Degenmen izdestirý toby jumysty bir sátke de toqtatpady.
Kóp uzamaı Zaton polısııa bóliminiń ýchaskelik ınspektorlary Beken Asyl men Darhan Jumaǵalıev jetkinshekti qala shetindegi ormannan tapty. Bala úıinen shamamen 10 shaqyrym qashyqqa uzap ketken. Polısııa qyzmetkerleriniń kásibı biliktiligi men tabandylyǵynyń arqasynda búldirshin aman-esen otbasyna qaıtaryldy.
Anasy men balasynyń qaýyshqan sáti — kópshiliktiń júregin eljiretti. Bul jaǵdaı barlyq jumyldyrylǵan kúshtiń, eriktilerdiń jáne beı-jaı qaramaǵan turǵyndardyń birlesken áreketiniń jarqyn mysalyna aınaldy.
Abaı oblysynyń polısııa departamenti izdeýge atsalysqan barlyq azamattarǵa shynaıy alǵys bildirip, kez kelgen tótenshe jaǵdaıda jedel áreket etý mańyzyn taǵy bir eske saldy.
