Foto: Sý resýrstary jáne ırrıgasııa mınıstrligi
Zertteý toby Balqash kóliniń basseınindegi sý resýrstarynyń qazirgi jaı-kúıin jan-jaqty baǵalaýdy maqsat etti. Sonymen qatar negizgi mindetterdiń qataryna jerústi jáne jerasty sýlaryn baqylaý, sýarmaly eginshiliktiń jaǵdaıyn taldaý, sondaı-aq óńirlik sý balansyn modeldeý úshin naqty derekter jınaý kirdi.
Ekspedısııa quramynda Fransııanyń ǵylymı konsorsıým ókilderi, QR Sý resýrstary jáne ırrıgasııa mınıstrligi, Balqash-Alakól basseındik ınspeksııasy, «Qazgıdrogeologııa» RMK, Ý.M. Ahmedsafın atyndaǵy ınstıtýt jáne «Qazaqmys korporasııasy» JShS sarapshylary boldy.
Mınıstrliktiń habarlaýynsha, mamandar Boıaýly, Bereke, Baqanas, Baqbaqty jáne Birlik aýyldyq okrýgterindegi sýarý ınfraqurylymyn tekserip, aýyl sharýashylyǵyn sýmen qamtý, kanaldardyń tehnıkalyq jaǵdaıy men jańǵyrtý qajettiligin zerdeledi. Sý únemdeý tehnologııalaryn engizý, sýdy qaıta paıdalaný jáne jerasty sýlarynyń deńgeıi de nazardan tys qalmady.
Ekspedısııa aıasynda Qapshaǵaı sý qoımasy, Ile ózeniniń tómengi aǵysy, Sorbulaq kóli, melıorasııalyq jáne artezıan uńǵymalary zerttelip, Almatydaǵy ǵylymı-zertteý ınstıtýttarynda kezdesýler ótken.
«Zertteý qorytyndysy boıynsha memlekettik organdar men múddeli taraptarǵa usynystar qamtylǵan taldamalyq esep daıyndalady. Fransýz sarapshylarymen birlesip iske asyrylyp jatqan bul joba 2040 jylǵa deıingi boljammen Balqash kólin saqtaý boıynsha master-jospar ázirleýge baǵyttalǵan. Júrgizilip jatqan zertteýler Qazaqstan men Fransııa arasyndaǵy ekologııa, sý paıdalaný jáne ǵylymı almasý salasyndaǵy strategııalyq áriptestikti nyǵaıtýǵa baǵyttalǵan mańyzdy qadam», dedi QR Sý resýrstary jáne ırrıgasııa mınıstrliginiń Sý saıasaty departamenti dırektorynyń orynbasary Marat Imanalıev.
Aıta keteıik, byltyr jeltoqsanda QR Sý resýrstary jáne ırrıgasııa mınıstrligi, Fransııanyń damý agenttigi (AFD) jáne Geologııalyq jáne taý-ken zertteý bıýrosy (BRGM) arasynda Balqash kóliniń basseınin keshendi zertteý jáne ony qorǵaýǵa baǵyttalǵan master-jospar ázirleý jóninde úshjaqty kelisimge qol qoıylǵan bolatyn.
