Foto: Aqorda
Prezıdent bul reformanyń ózegi – halyqpen tıimdi baılanys ornatý ekenin aıtty.
«Tórtinshi. Quqyq qorǵaý organdarynyń jumysyna servıstik model qaǵıdattaryn keńinen engizip, kadrlyq áleýetin kúsheıtý qajet. Polısııa men basqa da qurylymdar bılik jáne qoǵam arasyn baılanystyratyn altyn kópir bolýǵa tıis. Ol úshin «Memleket pen azamat – birtutas» degen irgeli qaǵıdatymyzǵa tolyq saı keletin halyqpen qarym-qatynastyń jańa mádenıetin qalyptastyrý kerek. Bul baǵytta ilgerileý bar. Biraq qabyldanǵan sharalar áli tıimdiligin kórsetpedi, óıtkeni birizdilik joq. Halyqpen tikeleı jumys isteýge kedergi keltiretin basy artyq bıýrokratııadan arylý kerek. Reformalardyń shynaıylyǵyna, ádildikke jáne memlekettik basqarý júıesiniń tıimdiligine azamattardyń senimi kóbine quqyq qorǵaý organdarynyń kásibı deńgeıine baılanysty», dedi Qasym-Jomart Toqaev.
Prezıdent ýchaskelik ınspektorlardyń rólin kúsheıtýdiń mańyzyn erekshe atap ótti. Ásirese, aýyldyq jerlerde olardyń atqaratyn qyzmeti – tek quqyq qorǵaý emes, azamattarǵa qoldaý kórsetý, keńes berý jáne ádilet ornatý ekenine nazar aýdardy.
«Ýchaskelik ınspektorlardyń áleýetin odan ári nyǵaıtý qajet. Sebebi olar is júzinde memleket men qoǵam arasyndaǵy basty dáneker sanalady. Ásirese, bul aýyldyq jerde anyq baıqalady. О́ıtkeni jergilikti turǵyndar úshin ýchaskelik ınspektor – qorǵaýshy, quqyqtyq keńesshi, tipti, ádildik surap júginetin sońǵy ınstansııa. Meniń oıymsha, aýyldaǵy ýchaskelik ınspektorlarǵa shen bergen kezde jeńildik jasap, ıaǵnı bir jyldyq eńbek ótilin 1,5 jyl dep esepteý qajet. Aýyldaǵy ýchaskelik ınspektorlardy baspanamen qamtyp, materıaldyq-tehnıkalyq bazasyn nyǵaıtý kerek. О́ńir ákimderi osy máselege muqııat nazar aýdarǵany durys. Ýchaskelik polısııany jańǵyrtýmen qatar patrýldik beketter qyzmetiniń jumysyn qaıta qaraý qajet. Patrýl qyzmetkerleri azamattarmen jumys barysynda ádep saqtap, kásibılik tanytqany jón. О́z kezeginde azamattar da polısııanyń zańdy talabyna baǵynýǵa mindetti. Áıtpese kóshede tártip bolmaıdy», dedi Memleket basshysy.
Memleket basshysy reformalar tek ózgeris úshin emes, qoǵamnyń quqyq qorǵaý organdaryna degen senimin arttyrý úshin júrgizilýi tıis ekenin málimdedi. Árbir quqyq qorǵaý qyzmetkeriniń ádilettiligi men adaldyǵy – tutas júıeniń bedelin qalyptastyrady.
«Jalpy azamattardyń qaýipsizdigi men zań talaptaryn múltiksiz saqtaý úshin quqyq qorǵaý júıesin odan ári reformalaý kerek. Biraq reformalar reforma úshin ǵana jasalmaıdy. Basty maqsat – qoǵamnyń quqyq qorǵaý júıesine senimin arttyrý. Keıbir qyzmetkerlerdiń ádiletsiz nemese nemquraıdy áreketi kúshtik qurylym ókilderiniń atyna kir keltiredi. Azamattar men bıznesten zańdy talap etkende, ózderińiz laıyqty úlgi kórsetýlerińiz qajet. Sonda ǵana polısııa qyzmetkerleri men azamattar arasynda senimdi áriptestik ornaıdy. Quqyq qorǵaý organdarynyń qyzmetin jetildirý qanshalyqty tabysty bolatyny sizderge baılanysty», dedi Prezıdent.
Quqyq qorǵaý organdarynyń qyzmetin laıyqty baǵalaý maqsatynda bıyldan bastap eńbekaqy tóleýdiń jańa júıesi engizildi. Bul, ásirese, aýdandyq deńgeıdegi qyzmetkerler úshin úlken qoldaý boldy. Máselen, úsh jyl tájirıbesi bar polısııa jedel ýákiliniń jalaqysy 60 paıyzǵa ósken.
Sonymen qatar, vedomstvolyq akademııa túlekterine qoldaý kórsetý tetikteri de qaıta qaralmaq.
«Bul rette memleket qoǵam qaýipsizdigi men eldegi zań ústemdigin qamtamasyz etetin jandardy jan-jaqty qoldaýǵa árqashan aıryqsha mán beredi. Meniń tapsyrmammen bıyldan bastap kúshtik qurylymdar eńbekaqy tóleýdiń jańa júıesine kóshti. Bul tásil, eń aldymen, aýdan deńgeıindegi qyzmetkerlerdiń jalaqysyn kóterýge múmkindik berdi. Máselen, úsh jyldyq tájirıbesi bar polısııa jedel ýákiliniń eńbekaqysy 60 paıyzǵa ósti. Biz tártip saqshylaryn quqyqtyq jáne áleýmettik turǵydan qorǵaý úshin keshendi sharalar qabyldaımyz. Vedomstvolyq joǵary oqý oryndary kýrsanttaryna jaǵdaı jasap, yntalandyrý mańyzdy. Olar – bizdiń kúshtik qurylymdardyń bolashaǵy. Oqýda úzdik nátıje kórsetken jáne úlgili tártibimen erekshelengen akademııa túlekterine birden «aǵa leıtenant» shenin berý qajet dep sanaımyn. Sondaı-aq olarǵa bos jumys oryndarynan ózi qalaǵan qyzmet túrin tańdaýyna múmkindik berilýi kerek. Úkimet zańǵa engiziletin ózgeristerdi ázirlesin», dedi Qasym-Jomart Toqaev.
