Foto: Almaty oblsynyń ishki saıasat basqarmasy
Memlekettik organdardyń ózara tıimdi is-qımyly men keshendi tásiliniń nátıjesinde óńirde quqyqbuzýshylyq deńgeıiniń aıtarlyqtaı tómendegeni atap ótildi. Quqyqtyq statıstıka jáne arnaıy esepke alý komıtetiniń Almaty oblysy boıynsha departamentiniń ýaqytsha basshysy Maksat Aıtımbetov usynǵan derekterge sáıkes, quqyqbuzýshylyq týraly ótinishter men habarlamalar sany 11,5%-ǵa, al tirkelgen qylmystyq quqyqbuzýshylyqtar sany 12,4%-ǵa azaıǵan.
«Quqyqbuzýshylyq týraly ótinishter men habarlamalar sany 35 069-dan 31 029-ǵa deıin qysqardy (–11,5%), al tirkelgen qylmystyq quqyqbuzýshylyqtar sany 4 481-den 3 925-ke deıin tómendedi (–12,4%). Asa aýyr qylmystar – 45,3%-ǵa, aýyr qylmystar – 14,7%-ǵa, al onsha aýyr emes qylmystar – 16%-ǵa azaıdy. Qasaqana adam óltirý eki esege (28-den 14-ke deıin), urlyq – shamamen úshten birge (922-den 653-ke deıin), usaq urlyq – tórt eseden astam (518-den 112-ge deıin) tómendedi. Qoǵamdyq oryndardaǵy quqyqbuzýshylyqtar – 19%-ǵa, al alkogoldik mas kúıinde jasalǵan qylmystar – 3%-ǵa azaıdy. Esirtki aınalymyna qatysty, satý maqsatynsyz tirkelgen quqyqbuzýshylyqtar 25,4%-ǵa qysqardy», delingen habarlamada.
Oblystyq Polısııa departamentiniń bastyǵy Meıram Ábikenov bul oń dınamıkanyń keshendi aldyn alý sharalarynyń arqasynda múmkin bolǵanyn jetkizdi. Onyń aıtýynsha, áleýetti qaýip tóndiretin aýmaqtarda jumys qarqynyn báseńdetpeı, profılaktıkalyq sharalardy kúsheıtý qajet.
О́z kezeginde oblys prokýrory Berik Adamov qylmystyń aldyn alýda zamanaýı tehnologııalardyń rólin atap ótti. Ol óńirde kisi óltirý 75%-ǵa, urlyq 37%-ǵa, mal urlyǵy 27%-ǵa azaıǵanyn aıtty. Sondaı-aq, qosymsha 9 000 beınebaqylaý kamerasyn ornatý jospary jarııalanyp, bul «soqyr núktelerdi» azaıtyp, qaýipsizdik deńgeıin arttyrýǵa septigin tıgizetinine senim bildirdi.
Jıynǵa sonymen qatar Ekonomıkalyq tergep-tekserý departamentiniń basshysy Danııar Aqjanov, Sybaılas jemqorlyqqa qarsy qyzmet pen UQK departamentiniń ókilderi qatysyp, salalyq máseleler men usynystaryn ortaǵa saldy.
Jazǵy demalys kezeńinde balalardyń qaýipsizdigine erekshe nazar aýdaryldy. Jol-kólik oqıǵalary men kámeletke tolmaǵandardyń qatysýymen bolǵan qaıǵyly oqıǵalarǵa baılanysty bilim berý, kólik jáne avtomobıl joldary basqarmalarynyń basshylary esep berdi. Sonymen qatar, keıbir aýdandarda jekelegen qylmys túrleriniń ósýi tirkelip, sol óńir ákimderi naqty túsinikteme berdi.
Jıyndy qorytyndylaǵan oblys ákimi Marat Sultanǵazıev qylmystyń tómendeýi barlyq múddeli organdardyń úılesimdi jáne jaýapkershilikpen atqarǵan jumysynyń nátıjesi ekenin aıtty.
«Qylmystyń tómendeýi – bul vedomstvolardyń úılesimdi jáne jaýapkershilikpen atqarǵan júıeli jumysynyń jemisi. Qabyldanǵan sharalar naqty nátıje berip jatqanyn kórip otyrmyz. Basty maqsat – qylmystyń aldyn alý, ýaqytyly áreket etý jáne óńir turǵyndarynyń qaýipsizdigin qamtamasyz etý. Bul – bizdiń negizgi basymdyǵymyz», dedi óńir basshysy.
Komıssııa jumysty jalǵastyryp, bolashaqta quqyqbuzýshylyqtardyń aldyn alýmen qatar, ótken tájirıbeden sabaq alyp, qaıtalanbaýyn qamtamasyz etýge erekshe nazar aýdaratyn bolady.
