Foto: ShQO ákimdigi
ShQO ákimdiginiń habarlaýynsha, qazirgi tańda qyzmet atqaryp turǵan Rıdder qalalyq aýrýhanasy – eldi mekendegi birden-bir kópsalaly medısınalyq mekeme. Ol tek qala turǵyndaryna ǵana emes, sonymen qatar Poperechnoe, Prıgorodnoe, Konovalovka, Lıvıno, Ýlbastroı jáne Leshoz aýyldyq okrýgteriniń halqyna da medısınalyq kómek kórsetip keledi. Alaıda, bul mekemeniń negizgi ǵımaraty men pedıatrııalyq bólimshesi ótken ǵasyrdyń 30–50-jyldary salynǵan jáne qazirgi zamanǵy standarttarǵa múldem saı kelmeıdi.
О́ńirdiń monoqala mártebesi, demografııalyq júktemeniń joǵary bolýy jáne júrek-qan tamyrlary aýrýlarynyń keń taralýy jańa aýrýhana qajettiligin ózekti etken. 2017 jyly turǵyndardan túsken ótinishter men tıisti organdardyń taldaýy negizinde jańa medısınalyq keshen salý týraly sheshim qabyldanǵan.
«Jobada 200 oryndyq stasıonar men aýysymyna 500 adam qabyldaıtyn emhanasy bar zamanaýı medısınalyq ınfraqurylymdy qurý kózdelgen. Jobany iske asyrý 2021 jylǵy jeltoqsanda bastaldy. Qurylys jumystarynyń jalpy quny – 34,8 mlrd teńge, onyń ishinde 11,8 mlrd teńge zamanaýı medısınalyq jabdyqtarmen qamtamasyz etýge baǵyttalǵan. 2024 jyly jobaǵa arnaıy memlekettik qordan qosymsha 28,1 mlrd teńge bólindi», delingen habarlamada.
Keshenniń jalpy aýmaǵy 40 myń sharshy metrdi quraıtyn úsh negizgi ǵımaratty qamtıdy. Qazirgi tańda qurylys jumystarynyń oryndalý deńgeıi tómendegideı:
- Emhana – 85% (qalqa men qasbeti aıaqtalǵan, ishki árleý jumystary, sanıtarlyq-tehnıkalyq jabdyqtardy ornatý, kireberis aımaǵyn abattandyrý aıaqtalýǵa jaqyn);
- Stasıonar – 40% (B blogy – 3 qabat – tolyq aıaqtalǵan, A blogynda (5 qabat) – jumystardyń 60%-y oryndaldy; monolıtti jumystar, syrtqy qabyrǵalardy qalaý, ishki qabyrǵalardy ornatý, árleý jáne qasbettik jumystar jalǵasýda);
- Tamaqtaný blogynyń daıyndyq deńgeıi – 92%.
Qurylys jumystaryna 258 maman tartylǵan. Barlyq jumystardy aıaqtap, nysandy paıdalanýǵa berý 2025 jyldyń jeltoqsan aıyna josparlanǵan.
«Rıdder qalasyndaǵy jańa kópsalaly aýrýhana kesheniniń salynýy – densaýlyq saqtaý júıesindegi ózekti syn-qaterlerge jaýap qana emes, sonymen qatar óńirdiń áleýmettik ınfraqurylymyn júıeli jańǵyrtýǵa baǵyttalǵan mańyzdy qadam bolyp tabylady. Bul joba medısınalyq qyzmetterdiń qoljetimdiligi men sapasyn arttyrýǵa, sondaı-aq Shyǵys Qazaqstan oblysynda densaýlyq saqtaý salasyn uzaq merzimdi turaqty damytýǵa septigin tıgizedi», delingen habarlamada.
