Sýret: kaz.inform.kz
Oblystyq energetıka jáne turǵyn úı-kommýnaldyq sharýashylyq basqarmasynyń málimetinshe, 34 mekeme ishki naryqty suıytylǵan gazben qamtıdy. Bul mekemeler 101 beketke ıelik etedi. Munaıly shaharda 56 gaz quıý beketi bar. О́ńirdegi 7 aýdanda osyndaı 45 beket ashylǵan. Munyń syrtynda 125 janar-jaǵarmaı beketi bar. Biraq basqarmanyń mamandary mindetine sáıkes kúndelikti otyn baǵasyna, qordaǵy qaldyqqa monıtorıng júrgizýmen shekteledi.
Atyraý oblystyq tótenshe jaǵdaılar departamenti basshysynyń orynbasary Syrym Jaımaǵambetovtiń aıtýynsha, ónerkásiptik qaýipsizdik, memlekettik órt baqylaý talaptaryna sáıkes qoldanylatyn krıterııler bar. Aıtalyq, ónerkásiptik qaýipsizdik boıynsha Atyraý qalasynda 36 janar-jaǵarmaı jáne gaz quıý stansasy tirkelgen.
«Janarmaı stansalary qurylys normalary standartyna sáıkes jobalanyp, salynady. Standartqa sáıkes avtomobıl janarmaıy jáne gaz quıý stansalary men turǵyn úılerdiń araqashyqtyǵy 60 metrdi quraýǵa tıis», deıdi S.Jaımaǵambetov.
Onyń aıtýynsha, 2020–2024 jyldary janar-jaǵarmaı jáne gaz quıý stansalarynyń qaýipsizdigine tekseris júrgizilmegen.
«Munyń birneshe sebebi bar. Birinshiden, janar-jaǵarmaı stansalarynyń qaýipsizdik máselesi qozǵalǵanda, kásipkerlik sýbektileriniń qyzmeti salalarynda memlekettik baqylaý men qadaǵalaýdy júzege asyrý tártibiniń saqtalýy turǵysynan tekserý tártibi belgilengen Kásipkerlik kodeksiniń 85-2-babynyń 5) tarmaǵy basshylyqqa alynady. Ekinshiden, 2020–2024 jyldary jarııalanǵan moratorıı, Investısııalar jáne damý mınıstriniń 2015 jylǵy 15 jeltoqsandaǵy №1206, Ulttyq ekonomıka mınıstriniń 2015 jylǵy 28 jeltoqsandaǵy №814 «О́nerkásiptik qaýipsizdik salasyndaǵy táýekel dárejesin baǵalaý ólshemsharttaryn jáne tekserý paraqtaryn bekitý týraly» birlesken buıryǵy bar. Osylardyń negizinde janar-jaǵarmaı stansalarynyń ónerkásiptik qaýipsizdigine tekserý júrgizý múmkin bolmady», dedi S.Jaımaǵambetov.
Jaqynda Qulsary qalasyndaǵy bir janar-jaǵarmaı stansasynda gaz-aýa qospasy jaryldy. Sonyń saldarynan bolǵan órtten 14 turǵyn kúıik alyp, 2 adam ajal qushty. Atyraý oblysy ákiminiń orynbasary Qaırat Nurtaev málim etkendeı, qazir bul qaıǵyly oqıǵaǵa baılanysty tergeý isi júrip jatyr.
«Atyraý qalasy men aýdandarda arnaıy komıssııa qurylady. Komıssııalarǵa ákimderdiń orynbasarlary tóraǵalyq etedi. Komıssııalar Atyraý qalasy men aýdandarda gaz quıý beketin ǵana emes, janar-jaǵarmaı nysandarynyń barlyǵyn tekserýi kerek. Barlyq jumys zań talaptaryna saı atqarylady. Qazir Atyraý qalasynda mundaı beketterdiń qaı jerde ornalasqany týraly negizgi tizim bar. Adamdardyń ómirine qaýip tóndirip turǵan nysandardy anyqtaý qajet», deıdi Q.Nurtaev.
Tótenshe jaǵdaılar departamenti memlekettik órt baqylaý basqarmasynyń bastyǵy, azamattyq qorǵaý podpolkovnıgi Baǵdat Abdýllınniń aıtýynsha, oblysta memlekettik órt baqylaý krıterııine sáıkes 144 janar-jaǵarmaı, 41 gaz quıý stansasy esepke alynyp otyr.
«Jobalaý-smetalyq qujattamany kelisýge, jer ýchaskelerin qurylysqa bólý, salynyp jatqan nysandardyń órtke qarsy jaı-kúıin tekserý jáne qurylysy aıaqtalǵan nysandardy qabyldaý jónindegi komıssııalarǵa qatyspaıdy.
«Sáýlet, qala qurylysy jáne qurylys qyzmeti týraly» zańǵa sáıkes nysandar qurylysynyń sapasyn baqylaý, sondaı-aq osy nysandarda sáýlet, qala qurylysy tártibin, jobalyq qujattamanyń sapasyn qadaǵalaýdy jergilikti atqarýshy organdar júzege asyrady», deıdi B.Abdýllın.
Byltyr órt qaýipsizdigine tekserý júrgizý josparyna 47 janar-jaǵarmaı stansasy engizilgen. Baqylaý men qadaǵalaý sýbektisine (obektisine) barý arqyly 24 janar-jaǵarmaı stansasyna profılaktıkalyq tekserý júrgizildi. 23 janar-jaǵarmaı stansasyna órt qaýipsizdigi salasyndaǵy sáıkestigi týraly aýdıt jasalyp, qorytyndysy berildi. Tekserý kezinde Tótenshe jaǵdaılar mınıstriniń 2022 jylǵy 21 aqpandaǵy №55 «О́rt qaýipsizdigi qaǵıdasy» talaptaryn saqtamaýǵa baılanysty birneshe kemshilik anyqtaldy.
Atyraý oblysy
