Foto: Úkimettiń baspasóz qyzmeti
Saltanatty rásimge qatysqan QR Premer-mınıstri Oljas Bektenov bul bastamany Prezıdenttiń qoǵamdyq qaýipsizdik pen quqyqtyq tártipti nyǵaıtý, sondaı-aq basqarý júıesin jańǵyrtý jónindegi naqty saıasatynyń mańyzdy nátıjesi ekenin atap ótti.
Quqyq qorǵaý salasyndaǵy reformalar júıeli túrde júzege asyp jatyr. Atap aıtsaq, Esirtki qylmysyna qarsy is-qımyl komıteti quryldy, kıberqaýipterge jáne turmystyq zorlyq-zombylyqqa qarsy is-qımyl boıynsha mamandandyrylǵan bólimsheler ashyldy, sıfrly ınfraqurylym men taldamalyq baza nyǵaıtylyp jatyr.
«Akademııanyń qurylýy – Memleket basshysy jarııalaǵan quqyq qorǵaý júıesiniń damý jolyndaǵy eleýli kezeń. Bizdiń mindetimiz – kadrlyq áleýetti nyǵaıtý arqyly quqyqtyq tártipti qamtamasyz etýdiń jańa modelin engizý. Instıtýsıonaldyq reformalar quqyq qorǵaý organdarynyń servıstik modelin damytýǵa yqpalyn tıgizedi. Prezıdent usynǵan basym baǵyt – azamattardyń qaýipsizdigi jáne “Zań jáne tártip” qaǵıdatyn qamtamasyz etý», dedi Oljas Bektenov.
Akademııa zamanaýı bilim berý tehnologııalarymen jabdyqtalǵan. Jańa oqý ornynda sıfrly zerthanalar, «aqyldy kózildirik», jasandy ıntellekti qoldanatyn júıeler, robot tehnıkasy, patrýldik avtokólikterdi baqylaý platformalary men basqa da jańa sheshimder engizilgen. Ishki ister mınıstri Erjan Sádenov Premer-mınıstrge vedomstvoaralyq joǵary akademııalyq kýrs tyńdaýshylaryn synaqtan ótkizý nátıjelerin kórsetti.
Oqytý baǵdarlamasy basqarý quzyretterin damytýǵa, strategııalyq oılaý men jańa tehnologııalardy meńgerýge baǵyttalǵan. Akademııada jyl saıyn 100-den astam basqarý qyzmetkerleri jáne 30 magıstratýra men doktorantýra stýdentteri oqytylady.
Qazirgi tańda Akademııa IIM aýmaqtyq bólimshelerinen kelgen tyńdaýshylardyń alǵashqy legin oqytýdy bastaǵan. Ashylý rásimine Bas prokýratýra, UQK, Joǵarǵy Sot Keńesi, mınıstrlikter, ákimdikter, Parlament depýtattary, halyqaralyq uıymdar, sarapshylar men sheteldik delegasııalar qatysty.
